Kriza Politike/ Zgjidhja, Basha: S’ka dialog me Edi Ramën. Më 16 Mars…

Kryetari i Partisë Demokratike, Lulzim Basha pas takimit me Zv/Ambasadoren e SHBA, Leyla Moses-Ones, tha se nuk do të ketë dialog me Edi Ramën, pasi marrëveshja që bëri me kryeministrin rezultoi e dëmshme për interesat e vendit dhe të shqiptareve ndërsa për takimin me kryediplomaten amerikane në Tiranë u shprehë:

“E kam bërë të qartë që nuk bëj asnjëherë komente as mbi deklaratat dhe as mbi takimet dhe kontaktet periodike që kemi me partnerët tanë strategjikë, në këtë rast me partnerin strategjik të Shqipërisë dhe të Partisë Demokratike, Shtetet e Bashkuara të Amerikës,” tha Lulzim Basha ndërsa foli për dy ditë të suksesshme bashkëpunimi me institutin Republikan Amerikan: 

“Kam vendosur të sjell standardet e demokracisë perëndimore në Partinë Demokratike dhe për këtë kam mbështetjen e të gjithë botës; kam mbështetjen e instituti Republikan Amerikan, kam mbështetjen e Partisë Konservatore Britanike, partisë tonë simotër në Britaninë e Madhe dhe natyrisht të Fondacionit Konrad Adenauer, të kristiandemokratëve të AngelaMerkel. Kjo do të thotë që me modelin që ne do të ofrojmë, deputetët e ardhshëm të Partisë Demokratike, kandidatët e ardhshëm për deputetë të Partisë Demokratike do të zgjidhen me parimin ‘një anëtar, një votë’  nga anëtarësia e plotë e Partisë Demokratike,” tha kryetari i Partisë Demokratike duke theksuar se qëllimi nuk është thjeshtë largimi i Ramës por shembja e sistemit që ai ka ngritur për të larguar parlamentin dhe qeverinë nga qytetarët, dhe e ka kthyer parlamentin dhe qeverinë në një vegël të krimit të organizuar dhe të një grushti  oligarkësh grabitqarë.

“Ky është modeli që unë ofroj. Ky është modeli që Partia Demokratike e ka në statutin e saj dhe me ndihmën e partnerëve tanë, shumë shpejt do të nisim hapat për të organizuar ‘primaret’ brenda Partisë Demokratike, me qëllim evidentimin e zonjave, zonjushave, burrave, grave dhe djemve më të zotë që do ti përfaqësojnë në garën e ardhshme për një parlament të lirë nga krimi, për një parlament që do t’i takojë qytetarëve shqiptarë.”

Edi Rama mbrëmë Lulzim Bashën e quajti “miku im” dhe sot i pyetur se kur do të flas me “mikun”, kryetari i PD shprehet:

“Komentet e shkaktarit të kësaj krize të shumëfishtë, nuk kam ndërmend ti bëj pjesë të këtij komunikimi sot. Populli ka folur, ka folur dhe dje, do të flasë në çdo protest, do të flasë dhe në 16 mars, Edi Rama bën mirë të dëgjojë zërin e popullit dhe ti hapë rrugë zgjidhjes politike, ti zgjidhë duart drejtësisë dhe të lejojë hetimin deri në fund të dosjes 339 dhe dosjes 184. Natyrisht unë e di se ai nuk është në gjendje ta bëjë këtë, sepse është pjesë e kësaj dosje. Por prandaj, zgjidhja kur të gjitha pushtet janë të kapura, mbetet në dorë të popullit dhe populli ashtu siç e ka marrë në dorë, do të vazhdojë të ketë në dorë fatin e tij deri sat ë kemi çlirimin e Shqipërisë nga krimi, një parlament dhe një qeveri të zgjedhur nga populli dhe jo nga kriminelët.

I pyetur nëse mund të ketë zgjidhje pa një dialog me Edi Ramën, kryetari i Partisë Demokratike ishte i prerë:  

“Patjetër që po, sepse dialogu midis meje dhe zotit Rama provoi të ishte i dëmshëm për interesat e Shqipërisë, në mënyrën se si u keqpërdor nga një njeri që hiqet sikur është kryetar i Partisë Socialiste, por është reduktuar në një bashkëpunëtor të krimit të organizuar dhe të oligarkëve grabitqarë që dëmtojnë interesat e shqiptarëve, dëmtojnë interesat e socialistëve, dëmtojnë interesat e demokracisë.”

Meqë e gjithë vëmendja e opinionit publik ishte perqëndruar tek takimi i mëngjesit me Zv/Ambasadoren amerikane, lideri i opozitës u pyet nëse ajo i kishte kërkuar të ulen në tryezë me Edi Ramën, ai përsëriti se nuk komenton deklaratat dhe takimet e partnerëve, ashtu si edhe qëndrimin e opozitës që mbetet i palëkundur:

“Nuk ka asnjë hap pas në luftën kundër krimit të organizuar që ka asgjesuar zgjedhjet dhe institucionet demokratike, ka vetëm hapa përpara. Këtë i kemi borxh Shqipërisë, këtë i kemi borxh edhe ëndrrës së gjithë shqiptarëve që “ta bëjmë Shqipërinë si gjithë Europa”, me parlament dhe qeveri të çliruar nga krimi. Me institucione që i shërbejnë qytetarëve dhe që japin llogari para qytetarëve dhe jo para Niçes, apo Bajrave, apo Shullazëve dhe ortakëve të tjerë të bandës aktuale që i thotë vetes qeveri.”   

Ndryshe, Zv.ambasadorja e SHBA, Leyla Moses-Ones sot ka zhvilluar për më shumë se një orë një takim në selinë e PD, me kryetarin e Partisë Demokratike, Lulzim Basha.