Kriza politike/ Zgjidhja, Basha: Zgjedhjet e parakohshme parlamentare dhe vendore në një ditë

Kryetari i Partisë Demokratike, Lulzim Basha, pas takimit me raportuesit e KiE tha se e vetmja zgjidhje për daljen nga kriza janë mbajtja sa më shpejt e zgjedhjeve të parakohshme parlamentare dhe atyre vendore në një ditë ndërsa i bëri thirrje Partisë Socialiste të reflektojë sa nuk është vonë.

Fillimisht, Lulzim Basha, bëri të ditur se çfarë u diskutua me raportuesit e KiE.

“Tek zgjidhja e krizës politike dhe gatishmëria e opozitës për të dhënë kontributin e saj për një reformë të vërtetë zgjedhore që do t’u kthejë sovranitetin qytetarëve dhe do iu kthejë votën qytetarëve dhe do të mundësojë përmes zgjedhjeve të parakohshme parlamentare një parlament legjitim, një qeveri legjitime, sundimin e ligjit, demokracinë, si kushtet për një bashkëjetesë demokratike për mirëqenie, për punësim, për ekonominë dhe punësimin që duan të gjithë qytetarët dhe po kështu për hapjen e rrugës së bllokuar drejt anëtarësimit në BE.”

Zgjedhjet e parakohshme parlamentare sot, tha lideri i opozitës, nuk janë çështje dëshire.

“Është një çështje vullneti e të gjitha palëve. PD dhe opozita e bashkuar kanë prezantuar një Plan të qartë prej 5 pikash për të përshpejtuar fazën e parë, atë të reformës zgjedhore dhe pastaj duke iu garantuar qytetarëve shqiptarë lirinë e votës, duke iu garantuar qytetarëve shqiptarë të gjitha kushtet për zgjedhje të lira dhe të ndershme, mbajtja sa më parë e zgjedhjeve të parakohshme parlamentare. Në Shqipëri janë përvijuar qartësisht 2 qëndrime, qëndrimi i një shumice absolute, jo thjesht dhe vetëm të opozitës por edhe vetë socialistëve që kështu nuk mund të vazhdohet më, që kjo situatë është e paqëndrueshme, e padurueshme, duhet nëj zgjidhje dhe i një pakice absolute që nuk do ndryshim. Do ta mbajë Shqipërinë në këtë gjendje sepse në këtë gjendje vazhdojnë të përfitojnë përmes korrupsionit, përmes veprimtarisë kriminale qindra milionë euro.”

Duke renditur dështimet e kësaj qeverie, Basha tha se është koha për të marrë vendimin e duhur dhe për të vendosur interesin e vendit mbi interesat politike.

“Dështimin me ekonominë, me shëndetësinë, me punësimin. Është koha për të marrë vendimin e duhur për vendin, për të vendosur interesin e vendit mbi interesat politike, nuk mund të vazhdojë më gjatë kështu.
Sot është e rëndësishme se përse nuk zbatohet ligji, pse mbahen në dorë Babani apo Kajmaku i Vorës. Në Shqipëri nuk ka shtet ligjor. Ligji nuk është i barabartë për të gjithë. Një nënë keqtrajtohet, ndërsa pushtetarët e kapur në afera korruptive nuk iu hyn gjemb në këmbë. Kjo situatë duhet të marrë fund. Jemi të hapur për të gjithë instrumentet që garantojnë ecjen përpara.”

Në fund, Kryetari i Partisë Demokratike, Lulzim Basha, duke i bërë thirrje Partisë Socialiste të reflektojë sa nuk është vonë tha se PD është duke përgatitur ofertën jo vetëm për reformën elektorale, por për të nxjerrë vendin nga kriza,

“Thirrja ime ndaj PS është të reflektojë sa nuk është vonë. Ndërkohë që në po  përgatisim ofertën tonë jo vetëm për reformën elektorale, por për të nxjerrë vendin nga kriza, të jeni të sigurt se edhe durimit të popullit po i vjen fund. Ka ardhur koha të ndërtojmë një demokraci ku çdo shqiptar të jetë aksionere as Rama e askush tjetër nuk mund të mendojë se  mund ta trajtojë vendin si çifligun e vet dhe shqiptarët si bujkrobërit e vet.”