Kriza politike/ Zgjidhja e vetme, Basha: Kthimi në normalitet kalon nga dhomat e burgut!

Duke konstatuar një përpjekje të koordinuar për ta kaluar skandalin me përgjimet e publikuara nga gazeta “Bild” pa reaguar, thjesht si një skandal më shumë, si një gjë që nuk kemi çfarë t’i bëjmë, ndaj duhet ta lemë të kalojë, Kryetari i Partisë Demokratike, Lulzim Basha, tha se nga kriza politike që është krijuar nuk mund të dilet duke ruajtur pandëshkueshmërinë; Dhe, kthimi në normalitetin politik kalon nga dhomat e burgut për politikanët e lidhur me krimin dhe politikanët e korruptuar.

“Një nga arsyet pse e keqja tek ne përsëritet është sepse ne nuk reflektojmë mbi të dhe të mësojmë nga gabimet për të mos i përsëritur më. Humbja  e busullës morale e ka normalizuar të keqen mes nesh dhe e ka humbur reagimin.

Duket se kemi prekur fundin. Nëse nuk do të reagojmë tani e keqja do të sundojë mbi çdo gjë. Nuk duhet dhe nuk do ta lejojmë këtë gjë. Këtë herë nuk do të kalojë më si më parë. Kjo gjendje nuk do të kalojë pa një ndryshim të thellë.”

Në këtë situatë, shumë njerëz pyesin: po cila është zgjidhja? Lulzim Basha thekson se përgjigja është një dhe e vetme: Drejtësia!

“Ndëshkimi i të gjithë atyre që kanë bashkëpunuar në mënyrë kriminale për vjedhjen e votës. Vetëm kështu do të mbyllim kapitullin famëkeq të manipulimit të zgjedhjeve.

Zgjidhja e vetme është: ndëshkim përmes drejtësisë. Kur miratuam reformën në drejtësi, ne e kishim seriozisht dhe ishim të bindur se një drejtësi e pastër dhe e pavarur është zgjidhja që na duhet, sepse thelbi i problemeve tona si shoqëri është pandëshkueshmëria, është fakti që politikanët, të pasurit dhe të fortit janë mbi ligjin, janë vetë ligji, kurse njerëzit e thjeshtë janë viktimat, që nuk i mbron as ligji dhe asgjë.”

Pandëshkueshmëria e politikanëve dhe e kriminelëve duhet të mbarojë dhe do të mbarojë tani, siguroi lideri i opozitës:

“Fatkeqësisht, drejtësia po mungon në Shqipëri. Fatkeqësisht, ajo që prisnim nga reforma në drejtësi, është rrënuar nga kapja e drejtësisë nga Edi Rama. Por kjo nuk mund të zgjasë më, sepse nga kjo krizë nuk mund të dilet duke ruajtur pandëshkueshmërinë. Këtë herë kthimi në normalitetin politik, kalon nga dhomat e burgut për politikanët e lidhur me krimin dhe politikanët e korruptuar. Këto ditë po dëgjoj histori dhe propozime nga më të çuditshmet për daljen nga kriza. Po dëgjoj të riciklohen teori dhe sllogane që në Shqipëri kanë dështuar plot herë për të kuruar dhe parandaluar krizat, sepse ato kanë vënë pazarin mbi parimin, sepse ato kanë devijuar nga rruga e ligjit, nga rruga e drejtësisë.”

Ne fund, Kryetari i Partisë Demokratike, Lulzim Basha, tregoi se cila është garancia e vetme:

“Shteti i së drejtës, barazia para ligjit, është e vetmja garanci për lirinë, demokracinë dhe mirëqeverisjen.”