Kroaci, kapen mbi 8 ton drogë, arrestohen 45 persona

Mbi 8 ton drogë të llojeve të ndryshme 6.7 tonë prej të cilave kokainë dhe 45 të arrestuar në disa zona në Kroaci, është epilogu i aksionit të zyrtarëve të policisë nga Zyra Kombëtare e Policisë për Luftën kundër Korrupsionit dhe Krimit të Organizuar, USKOK, dhe Policisë së Qarkut Split-Dalmaci, dy operacione këto të ndërlidhura që nisën nga mëngjesi i sotëm, njoftoi Ministria e Brendshme e Kroacisë.

Në shënjestër të Policisë dhe Prokurorisë ishin disa grupe kriminale që disa vite transportuan sasi të mëdha droge nga Amerika Latine dhe Shqipëria në Evropë, kryesisht kokainë, heroinë, marijuanë, hashash dhe droga sintetike, tha Ministri i Brendshëm i Kroacisë, Davor Bozhinoviç, duke saktësuar:
“Po flasim për sekuestrimin e më shumë se tetë tonëve të llojeve të ndryshme të drogës, ku pjesa më e madhe e saj është kokainë, rreth 6.7 tonë. Disa nga drogat u sekuestruan në Kroaci, por shumica e sekuestrimeve u bënë në Shtetet e Bashkuara dhe Spanjë.”

Ndryshe, Ministri i Brendshëm i Kroacisë, Davor Bozhinoviç, tha se më shumë se 2.600 krime të abuzimit me drogë ndiqen penalisht çdo vit në Kroaci, ndërsa 27 grupe kriminale të lidhura me trafikun e drogës ndiqen penalisht çdo vit, që është 35 për qind më shumë se më parë.