Kroaci, ata që vijnë nga Kosova, Maqedonia, Serbia dhe BeH, në vetëizolim!
Sot në mesnatë hynë në fuqi mbajtja e detyrueshme e maskës në transportin publik për pasagjerët dhe shoferët si dhe vetëizolimi për personat që futen në Kroaci nga Kosova, Maqedonia, Serbia dhe Bosnje Hercegovina, tha kreu i Shtabit Kombëtar të Mbrojtjes Civile të Kroacisë, Davor Bozhinoviç.
“Përcaktohet një regjim i caktuar për hyrjen në Kroaci të personave që vijnë nga Kosova, Maqedonia e Veriut, Serbia dhe BeH. Këta persona do të jenë të detyruar të vetëizolohen për 14 ditë në Kroaci. Detyrimi për izolim nuk zbatohet për ata që kalojnë tranzit nëpër Kroaci,” tha Bozhinoviç.
Ndërkohë për turistët ai sqaroi:
“Këto vendime janë marrë në bazë të rekomandimeve të epidemiologëve duke pasur parasysh situatën e këtyre vendeve fqinje. Numrin e të infektuarve e kemi, dhe shumica vijnë nga Bosnje Hercegovina dhe Serbia. Ne në baza ditore do të vazhdojmë të vëzhgojmë çfarë po ndodhë. Vendimet do ti marrim më shpejtë dhe do ti ndryshojmë nëse është e domosdoshme,” tha kreu i Shtabit Kombëtar të Mbrojtjes Civile të Kroacisë, Davor Bozhinoviç, duke përfunduar.
“Vendimi vlenë për të gjithë. Të gjithë ata që vijnë nga këto vende, pavarësisht nga shtetësia, duhet të vetëizolohen.”
Ndryshe, gjatë 24 orëve të fundit në Kroaci janë shënuar 22 raste të reja me koronavirus duke e çuar në 2.388 numrin e personave pozitiv me COVID-19. Deri më sot janë shëruar 2.145 persona, 107 kanë vdekur dhe 136 vazhdojnë të jenë në spitalin infektiv.
