Kroaci, temperaturat e larta u zëvendësuan me breshër!

Temperaturat e larta dhe me diell për vetëm 30 minuta u zëvendësuan me stuhi, reshje shiu dhe breshër në Dalmaci të Kroacisë.

Gjithçka filloi rreth orës 13:30 ku zona e Kashtelit u përfshi nga një mot me stuhi dhe breshër, dhe filloi të zgjerohet rreth zonës së Splitit ku vazhdojnë edhe në këto momente bubullima dhe shkreptima të fuqishme.

Interesante është se para prishjes së motit, temperaturat ishin të larta, kryesisht mbi 25°C, dhe vetëm për gjysëm ore temperatura në Kashtel Shtafiliç ra në 13°C.

Aktualisht për gjithë territorin kroat është lëshuar alarmi i verdhë meteorologjik, me përjashtim të jugut të Kroacisë, për shkak të motit me shi dhe shkreptimave.

Ndryshe, Enti Shtetëror Hidrometeorologjik, për bregdetin kroat sot ka parashikuar kohë me diell, me reshje lokale të shiut ndërsa në pjesën tjetër të vendit, kohë me vranësira dhe periudha të shkurta me diell. Vende vende me shi, pasditja me shi i shoqëruar me shkreptima. Era e lehtë, në bregdet nga jugperëndimi.

Temepratura më e lartë 19-24°C, në bregdet 24-29°C.