Kroaci, vetëm një ditë pas zgjedhjeve, HDZ krijon koalicionin qeverisës

Kryeministri aktual i Kroacisë dhe Kryetari i HDZ, Andrej Plenkoviç mori mbështetjen e pakicave kombëtare, HNS dhe Reformistëve për formimin e qeverisë së re kroate, vetëm një ditë pas zgjedhjeve parlamentare dhe pas konsultimeve të para që i zhvilloi Plenkoviç, bëri të ditur sot përmes rrjetit social Twitter zëdhënëi i qeverisë.

“Kryeministri zhvilloi raundin e parë të konsultimeve me të gjithë përfaqësuesit e sapo zgjedhur të pakicave kombëtare, HNS-n dhe Reformistët. Ata i kanë dhënë mbështetje shumicës së re parlamentare  në qeverinë e HDZ-s të cilën do ta kryeson Andrej Plenkoviç,” thekson zëdhënësi i qeverisë kroate, Marko Miliç.

Për shumicën e re parlamentare, HDZ me 66 mandate të fituara, i mjaftojnë votat e pakicave – 8 mandate, Reformistëve – 1mandat dhe HNS – 1 mandat por nuk përjashtohet edhe bashkimi i ndonjë deputeti tjetër që vjen nga lista e ndonjë partie tjetër.

Sidoqoftë, sot mbledhja e Kryesisë dhe Këshillit Kombëtar të HDZ-së do të analizoj fitoren elektorale dhe do të miratoj strategjinë e negociatave për formimin e qeverisë së re.  

Sot kryeministri aktual dhe kryetari i HDZ, Andrej Plenkoviç, përmes rrjetit social Twitter falënderoi të gjithë ata që votuan në zgjedhjet parlamentare dhe përcaktuan drejtimin e Kroacisë:

“Falemnderit të gjithëve që votuan dje dhe përcaktuan drejtimin e Kroacisë. Ky rezultat na obligon që të vazhdojmë me përgjegjësi të punojmë për Kroaci më më të mirë dhe më të sigurt.”

Ndryshe, pjesë e kësaj përbërje të re parlamentare do të jetë edhe Ermina Lekaj Përlaskaj nga Prizreni e cila për herë të tretë korrë fitore si përfaqësuese e Unionit të Shqiptarëve në Kroaci.