Kroacia beson në nisjen e negociatave Shqipëri, Maqedoni e Veriut – BE

Kryeministri kroat, Andrej Plenkoviç, beson se Shqipëria dhe Maqedonia e Veriut do të nisin shumë shpejt negociatat për anëtarësim në Bashkimin Evropian.

Plenkoviç bashkë me presidentin e Këshillit Evropian, Charles Michel, tha në Zagreb se shteti i tij po bënë përpjekje të krijojë një klimë pozitive, që mund t’ua mundësojë këtyre dy shteteve arritjen e qëllimit të tyre.

Më 1 janar të këtij viti, Kroacia ka marrë kryesimin e presidencës së BE-së duke treguar se do të mbështesë Tiranën dhe Shkupin.

Ndryshe, Franca dhe Holanda kanë penguar nisjen e bisedimeve për këto dy vende vitin e kaluar, duke nxitur zhgënjim dhe shqetësim për shkak të mundësisë së rritjes të ndikimit rus dhe atij kinez në Ballkanin Perëndimor.

Për të qenë i gatshëm për anëtarësim në BE, vendi që aplikon duhet fillimisht të negociojë 35 fusha, duke përfshirë, bujqësinë, transportin, energjinë, dhe politikat gjyqësore e shoqërore.

Presidenti francez, Emmanual Macron tha gjatë javës se ai dëshiron që Samiti BE-Ballkan, që është caktuar të mbahet në muajin maj, “të jetë moment i unitetit” për Evropën.

Këto deklarata, për zyrtarët e lartë kroatë janë shenja se zgjidhja mund të gjendet para takimit të liderëve të bllokut evropian në muajin mars./RFE/