Kronikë e një dështimi, Basha: Spitalet të papërgatitura, të ndiqen këshillat e mjekëve!

Nuk është koha për panik, por është koha për kujdes, thekson sot Kryetari i Partisë Demokratike, Lulzim Basha, kur personeli shëndetësor rrezikon nga koronavirusi me maska të skaduara dhe spitalet janë totalisht të papërgatitura për fluksin, dhe ai propozon vetëm të ndiqen me përpikëri këshillat e mjekëve.

“Nuk është koha për panik, por është koha për kujdes. Kjo është një thirrje për të rritur kujdesin. Nëse vihemi në panik nuk do të mund të kujdesemi as për veten tonë, as për familjarët tanë dhe kryesisht për të moshuarit, që kanë më shumë nevojë. Është shumë e rëndësishme që të ndiqen me përpikëri këshillat e mjekëve, duke shmangur sa të jetë e mundur grumbullimet. Mburoja e vetme kundër këtij virusi janë shërbimet shëndetësore,” thekson Lulzim Basha duke ndarë me publikun një shqetësim të jashtëzakonshëm:

“Personeli shëndetësor rrezikon me maska të skaduara. Ata kthehen në viktimat e para dhe transmetues të virusit te qytetarët. Kjo është papërgjegjshmëri totale. Spitalet janë totalisht të papërgatitura për fluksin, e kam fjalën për ata që do kenë nevojë për trajtim në kushte spitalore. Kapacitetet aktuale nuk kalojnë 120 njësi të përgatitura për të trajtuar 120 të infektuar, që ju kërcënohet jeta. Kjo është kronikë e një dështimi.”