Krujën e lanë pa ujë dhe pa rrugë, Berisha: Premtoj, çlirimin nga banditët e gjobëvënësit!

Krujës i kanë hequr institucionet, e kanë lënë pa ujë dhe pa rrugë, tha Kryetari i Partisë Demokratike, tha Sali Berisha, pas takimeve me bizneset në Tregun Artizanal të Krujës, ku dhe premtoj çlirimin e çdo centimetri katror të këtij vendi nga banditët, nga vrasësit dhe gjobëvënësit.

Ndërkohë për fermerët e Krujës, Kryetari i Partisë Demokratike premtoi që qeveria demokratike do të 6-fishojë subvencionet!

“Në disa mbështetje do ua bëjmë, energjinë do e ulim, energjinë do e zbresim nga 18 në 6 lekë. Ujin do e përgjysmojmë. Bashkisë do ia vëmë kufirin tek thana, nuk do mund të vërë taksa sipas qejfit, por kurrë më shumë se sa 1 përqind të xhiros.
Do bëjmë gjithçka të promovojmë sa më shumë prodhimin vendas, por duke krijuar klimën më miqësore ndaj biznesit. Cilido që do të shohë përqendrimin më absolut të pushteteve, le të vijë në Krujë.
Kryeqytet krenar, i pavdekshëm, i kombit shqiptar, e kanë zhveshur nga të gjitha institucionet. 12 vite, përveç Bushit që investon për vete, 0 zero investime përveç betonit. Rruga ashtu siç ka qenë, ka mbetur.
Të gjitha institucionet ia kanë hequr Krujës. Një rrugë, e premtuar dhe me projekt të gatshëm, ecën sa për të mos mbaruar ndonjëherë.
Kruja, emrin e merr nga fjala e bukur krua, kroje, dhe ujë nuk ka. U ngjit njëherë ai, çfarë emri t’i vëmë, por u ngjit dhe e ktheu një gotë ujë atje, por uji nuk erdhi në Krujë, ajo që erdhi, erdhi me probleme dhe Kruja mes ujërave dhe krojeve vuan për ujë. Po kështu fermerët e Krujës, po kështu biznesmenët e Krujës.
Ne jemi për një ndryshim të madh.

Së pari këtë ndryshim ne do ta nisim atje ku është dhimbja, dhe dhimbja është tek ata, të cilët paguhen sot 3 herë më pak se sa duhet të paguheshin po të krahasohej rritja e çmimeve. Pra, një pensionist që në vitin 2013, vit në të cilin buka ishte 400-500 lekë dhe sot është 900-1000 lekë, vit në cilin domatet ishin 100 lekë dhe sot janë 400 lekë. Pra, mallrat dhe ushqimet baze ishin mbi 100 përqind më të lira se sot.
Në qoftë se bëjmë modelimin, do gjejmë se pensioni që ishte 120 euro, duhej të ishte sot minimumi 390-400 euro në qoftë se rregulli është që rritja e çmimeve të mbulohet me rritjen e rrogave dhe pensioneve.
Por ky u kujtua për rrogat e veta, rriti rrogat e zyrtarëve të lartë, i tre ose katërfishoi ato, kurse rrogat e ulëta dhe pensionet i la me indeksim apo pa indeksime, dhe faktikisht qoftë rroga e ulët, qoftë pensioni, janë në përpjestim të zhdrejtë me çmimet.
Çmimet këtu janë sa në Europë, sa në Itali, çmimet e ushqimeve dhe mallrave bazë po flas.
Buka u kushton shqiptarëve rreth 80 herë më shumë se europianëve. Pse? Se duket shifër e lartë shumë. Por e para, shqiptarët konsumojnë bukë 4 herë më shumë se mesatarja evropiane. E dyta, shqiptarët kanë rrogën 6 herë më të ulët se mesatarja evropiane. Pra, janë një seri faktorësh që e bëjnë bukën një mall të kushtueshëm, shumë më të kushtueshëm se ç’duhej të ishte për shqiptarët.
Dhe tani këta zotërinjtë, si ngushëllim kanë nxjerrë shprehjen, në Shqipëri nuk vdes kush për bukë. Tani duhet të jemi realistë, në Shqipëri njerëzit e kanë ndarë kafshatën me njëri-tjetrin, nuk kanë lënë njëri-tjetrin të vdesë.
Dhe të dalësh sot të justifikosh varfërimin që u ke bërë të tjerëve, në një kohë kur bashkëmoshatari i tij në Mal të Zi që merrte më pak në vitin 2013, tani merr 450 euro pension, ti nuk bën gjë tjetër vetëm u justifikon vjedhjen qytetarëve.
Nuk është problemi të shkojë puna të vdesë njeriu për bukë, problemi është që njeriu të ketë gjërat bazë pa ngushtim, pa dhimbje, të mos detyrohet të përzërë fëmijët nga sofra. Pra, ka një qëndrim të papërgjegjshëm shumë ndaj qytetarëve,” tha Sali Berisha duke premtuar gjashtëfishimin e subvencioneve për çdo fermer!

“Çfarë do bëjmë ne? Ne thjesht fare që ta dini, ne do kthejmë paratë tek ju. Ne, paratë që marrim nga qytetarët, nga secili prej jush, ne do i kthejmë një pjesë të mirë tek ju për rroga, për pensione, dhe do vendosim minimumin jetik.
Minimumi jetik është një shumë me të vërtetë minimale, 200 euro, por është një shumë që çdo shqiptar e nxjerr jashtë varfërisë ekstreme. Një njeri që merr 6.3 euro në ditë nuk është në varfëri ekstreme. Është i varfër, por jo në varfëri ekstreme.
Kështu që me këtë ne bëhemi një shoqëri më e drejtë, më e moralshme dhe dëshmojmë se nuk do lëmë njeri në vuajtje, në dhimbje, në mjerim. Këto brenda 100 ditëve.
Së dyti, rrogat e ulëta do i ngremë në 500 euro. Rrogat sot, nëse do kishin ndjekur ligjin e inflacionit, rrogat e ulëta sot duhej të ishin 730 euro. Po këta menduan vetëm për rrogat e larta, trefishuan, katërfishuan rrogat e larta.
A mund të imagjinoni ju këtë vend me zyrtarë që marrin 7 mijë euro në muaj. Në botë, një vend i tillë nuk ekziston, që një punonjës të marrë 7 mijë euro, një pension të jetë 120 euro. Kjo është jashtë çdo lloj morali dhe ka vetëm moralin e Edi Ramës, një narkoshteti, që sundon me krimin, që vjedh me krimin dhe largon shqiptarët çdo ditë nga Shqipëria.
Pra, rrogën si hap i parë 500 euro, bizneset, ata më treguan se këto 12 vite nuk janë bërë as 10 përqind të investimeve në këtë qark se ato që u bënë 8 vite para tyre.
Edi Rama e ka inauguruar dy herë rrugën e Sari Sëlltikut, të ndërtuar dhe inauguruar nga ne. Dhe mendon se është harruar, por nuk e di ai se krutanët i japin ujë në bisht të lugës atij.
Të kishte pasur ai një të katërtën e mençurisë së krutanit, Shqipëria do ishte krejt tjetër sot.
Taksat kanë qenë shumë të larta. Merrni TVSH-në, shqiptarët paguajnë 9 për qind të prodhimit të brendshëm si TVSH, 6 për qind paguajnë gjermanët dhe italianët sepse këta janë vërsulur me taksa mbi çdo gjë.
Jo, ne nuk kemi atë filozofi. Ne krahas filozofisë t’ua kthejmë paratë qytetarëve, kemi tjetrën, t’ua lëmë paratë biznesmenëve për të zgjeruar aktivitetin e tyre, për të zgjeruar vendet e punës, për të prodhuar më shumë. Dhe kjo funksionon. Kjo ka funksionuar.
Jam i sigurt se ne brenda vitit të parë do kemi një rritje të madhe të prodhimit.
Made in Albania do të jetë synimi ynë më kryesor.
Fermerët janë në kushte shumë të vështira. Subvencionet, edhe ato që jepte BE, i mori Edi Rama me akrabanë e vet. Po pse them unë Edi Rama? Sepse BE e kapi në flagrancë ministren e Shqipërisë, e cila kishte abuzuar në mënyrë të rëndë me 130 milionë euro të dhëna për fermerët shqiptarë.
Në vend që t’ua jepte fermerëve, ua shpërndante oligarkëve, djegësit të Tiranës, ua shpërndante pra rrethit të Tiranës.
BE e ndërpreu ndihmën, po bën një hetim, Edi Rama, meqenëse ishte bashkautor në këtë abuzim, Krifcën, e cila u bë famoze se do ngrinte akademinë e çobanëve, e mori këshilltare.
Sigurisht, se ajo ka zbatuar urdhrat e tij. Ne do 6-fishojmë subvencionet për çdo fermer. Ne heqim çdo barriere jo ka 100 kokë, jo ka 10 kokë, jo ka kaq hektarë, aq hektarë. Çdo fermer do subvencionohet për çdo njësi prodhimi, për çdo kokë bagëti, për çdo fidan të mbjellë.
Do ketë kredi të buta, 80 përqind të interesave për fermerët dhe biznesin e vogël, do e mbulojë shteti.
Do ndalohet me ligj importimi i inputeve bujqësore që nuk shiten në të paktën dy vende të BE. Sikundër i ilaçeve që nuk shiten në të paktën dy vende të BE,” tha Sali Berisha duke vlerësuar se njëri nga problemet më të mëdha që përballen sot shqiptarët është shëndetësia.
“Statistika e fundit zyrtare e INSTAT tregon se në Shqipëri aktualisht shpenzohen nga xhepi i qytetarëve për kujdes shëndetësor 820 milionë euro.
Këto janë dy herë më shumë se për bukën. Pra në qoftë se buka shpenzimin vjetor e ka 220 euro për person, ilaçet e kanë 400 euro për person. Dhe imagjinoni se këtu gjysma ose më shumë nuk kanë nevojë për to. Pra ata që kanë nevojë, ata paguajnë qimet e kokës ose mbeten pa mjekim.
Imagjinoni tani pensionistët se si mund të përballojnë marrjen e ilaçeve me atë pension që nuk del as për kafshatën.
Çfarë premtojmë ne? Ne premtojmë së pari asnjë ilaç në Shqipëri nuk do shitet që nuk shitet në dy vende anëtare të BE. Pra do jenë të sigurta, nuk do jenë të skaduara.
Së dyti, lista e republikës italiane për rimbursim. Atë listë ilaçesh që Italia ia paguan qytetarëve të vet, do e paguajë Shqipëria për qytetarët e saj.
Ne nuk jemi të pasur si Italia, por do e kapim nga themeli, për shëndetin do jemi. Shëndetin do e sigurojmë, nuk sigurojmë shumë gjëra të tjera, por këto gjëra bazë do i sigurojmë.
Dhe u garantoj këtu se nuk do ndodhë më siç ndodh, që të sëmurët me sëmundje të rënda nuk kanë ilaçet dhe mbeten në mëshirën e sëmundjes dhe Eid Rama thotë ky është krim kundër njerëzimit. Po ti je kryeministri, je njeriu që disponon buxhetin, disponon fondin rezervë të qeverisë dhe ti ndërhyn me urgjencë që kjo të marrë fund. Asnjë masë nuk ka marrë!
Pra, situata është alarmante. Situata është emergjente. Një frymë fitoreje në të katër anët e Shqipërisë.
E shihni ju se çfarë fushate bën. Ka 2 muaj që është mbyllur nuk del para asnjë gazetari sepse nuk di të përgjigjet, nuk mund të mashtrojë më. Nuk mund të përgjigjet për të gjitha vjedhjet e mëdha. Se ka marrë 130 milionë euro të djegësit të Tiranës dhe djegësi nuk ekziston dhe i ka ngelur tani rroftë e qoftë Altin Dumani që nuk më dënon.
Dhe tjetra, një gjykatës guximtar dhe e përgëzoj, ka ndërtuar vilën. Sarajet e tij në Surrel janë me themele dy herë më të gjata se sarajet e Enver Hoxhës në qendër të Tiranës. Me një dallim, diktatori nuk i regjistroi në emrin e vet, as të familjes së tij, por i regjistroi pronë shtetërore. Dhe në atë kohë shtëpia lejohej të regjistrohej.
Ky jo që e ka në emër të vet dhe që e ka ndërtuar duke pasur të deklaruar gjithsej 3800 euro, por ka një oborr 8300 metra. Dhe jo vetëm kaq, po tokën e ka marrë në kundërshtim me çdo ligj dhe këto janë kapur tani. Skapi ia kaloi për të shpëtuar, prokurorisë së Tiranës. Prokuroria e Tiranës tha me të drejtë, nuk është puna jonë kjo.
E ktheu prapë. Shkoi në gjykatë çështja, një gjykatës guximtar e urdhëroi Skapin ta hetojë.
Ka qenë dy ditë më parë në Skap janë bërë mbledhje emergjente. Ra bomba dhe ky dilte pasdite burrë më të mirë se Altin Dumani nuk ka Shqipëria, sepse duket se përsëri bënë një marëveshje për ta mbyllur dosjen përsëri. O Edvin, po le ta mbyllë 100 herë, por toka është aty.
Pra, në këtë aspekt, miqtë e mi, është i pashpresë. Asgjë nuk e shpëton. Aktet që ka kryer ai me Lubi Ballukun janë të pafalshme dhe ato në fakt përbëjnë një dënim përjetë për secilin që kryen akte të tilla,” tha lideri i opozitës duke u bërë thirrje qytetarëve të Krujës, pavarësisht nga bindjet politike:

“Nuk është çështja për PD-në këtu apo për ndonjë parti tjetër, çështja është në radhë të parë për xhepin tënd, për pensionin tënd, për rrogën tënde, për biznesin tënd.
Krujës i premtoj investimet më serioze, me ujësjellësin, në lidhjen me Tiranën, në zonat turistike të cilat nuk arrihen dot.
I premtoj çlirimin e çdo centimetri katror të këtij vendi nga banditët, nga vrasësit, nga gjobëvënësit.
Ju e morët vesh, nga një masakër në një masakër tjetër.
Mbrëmë rrugët e Tiranës u skuqën, 4 vetë morën breshëri dhe gjer tani narkoshteti nuk është në gjendje të thotë se çfarë ishin ato, por kurrë nuk mund të gjuhej mbi një 11-vjeçar.
Mirëpo njeriu që i ndërsen dhe u thotë hani kokën njëri-tjetrit, por më shërbeni mua, krijon këtë situatë,” tha Kryetari i Partisë Demokratike para qytetarëve të Kruj duke u zotuar:

“Ne do bëjmë ligjin dhe ata të cilët përzihen, i lutem shumë çdo qytetari të mbajë shënim personin që u bën presion dhe u kërcënon për votën, absolutisht do shpallet terrorist pas këtyre zgjedhjeve. Pas këtyre zgjedhjeve ai do listohet si terrorist dhe do trajtohet si terrorist. Ne do bëjmë ligjin!”

Gjatë takimeve me bizneset në Tregun Artizanal të Krujës, tregtarët u ankuan për shpopullimin dhe Berisha premtoi se do e ndryshon këtë realitet, do nxitet prodhimi dhe punësimi.

“Zoti u dhëntë shëndet njëherë në radhë të parë dhe ishalla fitoni, ishalla riktheheni.
Do fitojmë. Dhe të jesh e sigurt që ne do bëjmë gjithçka për suksesin e biznesit.
Do ulim energjinë në 6 lekë, e paguani 18 sot.
Do përgjysmojmë tarifën e ujit.
Do e ulim shumë tarifën për hapësirën publike.
Do vendosim pensionin minimal 200 euro.
Do vendosim rrogën minimale 500 euro.

Ne si qytetarë të Krujës duam diçka për Krujën personalisht, çfarë do të bëhet sepse shpopullimi është në maksimum…
Për Krujën, rrugën Krujë-Tiranë. Nxitja e bizneseve që të zgjerojnë dhe të prodhojnë sepse të rinjtë duan punë. Tërheqja e industrive, këtu fasonët mezi jetojnë sot.

Një popull pa të rinj ka marrë fund…
Do bëjmë gjithçka të kthehen ata që na ikën, duke u dhënë të drejtën e investimit 5 vite pa taksa. Do bëjmë gjithçka që çiftet e reja të jenë me tre fëmijë dhe fëmijën e tretë do e paguajë shteti nga lindja deri në 23 vjeç. Për fëmijën e parë dhe të dytë do japim bonuse 60 dhe 70 euro. Pra, e ke shumë të drejtë shqetësimin. Themelore është ajo që thoni ju.

Ne në këtë Krujë presim vetëm majin e deri në shtator dhe pastaj çdo gjë mbyllet. Ky është problemi ynë kryesor…
E shkretoi Shqipërinë ky. E ke të drejtë shumë këtë, por këtë realitet do e ndryshojmë ne. Të garantoj se qëllimi ynë numër një është të ndryshojmë këtë realitet. Sot ne jemi aq sa kemi qenë në vitin 1960. Dhe e dyta, nga viti 2007 deri në vitin 2013, Shqipëria u rrit nga viti në vit, nga viti 2014 e këndej filloi rënia vertikale.

Atëherë, bashkëshorti im ka ikur në vitin 1990 në ambasada kur ishte 17 vjeç. Ne jemi kthyer në vitin 1998 dhe nga viti 1999 kemi këtë biznes. Mund të them se është gjithmonë në ulje…
Sepse ulet fuqia blerëse. Rritja e çmimeve të ushqimeve dhe gjërave bazë dhe mosrritja e rrogave dhe pensioneve ka ulur në mënyrë dramatike fuqinë blerëse të njerëzve. Ky është shkaku dhe largimi i njerëzve nga Shqipëria.