Kryemadhi mes Bashës dhe Ramës…

Monika Kryemadhi, Kryetare e LSI-së, forcës së tretë politike në vend, duket se po bën një lojë të dyfishtë sa në opozitë aq edhe në qeverisje.

Kryemadhi me forcën e saj politike zyrtarisht është në opozitë, por duket se kokën e mban të kthyer nga qeverisja.

Në raport me opozitën, të paktën publikisht ajo bën një dallim në raportet që ka me ish-kryeministrin Sali Berisha, ndërsa në mazhorancë nuk fsheh simpatinë ndaj Erjon Veliajt.

Këto duket se përbëjnë edhe dy pikat më të forta të Kryemadhit si drejtuese e LSI në raport me mazhorancën dhe opozitën.

Në përplasje të vazhdueshme me Ramën, por jo me Veliajn, me dyshime në krah të Bashës, dhe me besim të plotë tek Berisha, Kryemadhi ka krijuar profilin e politikanit që do të jetë në anën e pushtetit, pavarësisht se kush do të jetë fitues.

Me lëvizjet e saj duket se ka vënë në lojë Ramën si ish-bashkëkryetar i koalicionit qeveritar PS-LSI, dhe sikur bën sikur është në opozitë me Bashën.

Referuar asaj që ka ndodhur nga 2005 e këtej me LSI-në nuk është e vështirë të kuptosh se është një forcë që nuk ka moral, që mund të bëjë kompromise pushteti, qoftë edhe në rang lokal.

Në 2007 bënë koalicion me Ramën, që kishte marrë drejtimin e PS-së, në 2009 u përfshinë në koalicion me Berishën, në 2011 mbështetën Bashën në Tiranë, por jo kandidatët e tjerë të PD-së në bashki të ndryshme të vendit, në 2013 u rreshtuan në krah të Ramës duke harruar akuzat më monstruoze që kishin shkëmbyer, në 2015 gjithashtu u rreshtuan me Ramën, në 2017 dolën në opozitë pa dëshirën e tyre, port ë imponuar nga marrëveshja e 17 Majit Rama-Basha. Ndërsa në 2019-ën apo 2021 askush nuk e di se ku do të jetë LSI, në krah të dyshes Rama-Veliaj apo Basha-Berisha.

Në deklaratat publike, kryetarja e LSI është munduar të bëjë një diferencë mes Edi Ramës dhe Erjon Veliajt, gjithmonë duke vlerësuar këtë të fundit dhe duke e ndarë nga ajo që e quan “e keqja e madhe” që drejtohet nga Edi Rama.

Madje publikisht Kryemadhi hodhi tezën se Erjon Veliaj rrezikon kandidimin për një mandat tjetër për shkak të përplasjeve me Ramën.

Në fakt Veliaj dhe Rama nuk është se kanë pasur ndonjë përplasje, madje edhe në rastin e Teatrit Kombëtar kanë qenë në unison për projektin e ri, firmën që do të bëjë ndërtimet, e cila konsiderohet si “kliente” e Kryebashkiakut të Tiranës.

Në anën e opozitës, Kryemadhi ka një raport korrekt me Bashën, por shumë pak të afërt në krahasim me atë të vendosur me ish-Kryeministrin.

Duket se kryetarja e LSI-së ka ndjekur këshillat e bashkëshortit të saj President, i cili për 4 vite me rradhë ishte në krah të Berishës dhe në 4 të tjera në krah të Ramës.

Në përballjen aktuale politike, Kryemadhi mund të zgjedhë Bashën përballë Ramës, por një gjë është e sigurtë, Erjon Veliajn kundrejt të dyve.