Kryeministri i Kosovës: BE dhe SHBA po sillen shumë butë ndaj Serbisë!
Kryeministri i Kosovës, Albin Kurti, tha se Bashkimi Evropian dhe Shtetet e Bashkuara janë treguar shumë të buta ndaj Serbisë dhe duhet t’ia caktojnë një ultimatum për t’i vënë sanksione Rusisë.
Serbia, thekson Albin Kurti në një intervistë për “Financial Times” , duhet të rreshtohet kah Perëndimi në mënyrë që t’i japë Kosovës siguri sepse është e përkushtuar në normalizim raportesh.
“Sapo që Serbia t’i vë sanksione Federatës Ruse, atëherë do të ishte një moment kur ata mund të tregojnë se duan të integrohen në BE, dhe Serbia pa Rusinë nuk mund ta kërcënojë sigurinë e kontinentit. Atëherë do të mund të besoja se në thelb duan paqe. Dhe SHBA e BE nuk do të përpiqeshin që t’i qetësonin më,” tha Kryeministri i Kosovës duke vlerësuar qasjen që duhet të kenë Brukseli dhe Washintgoni ndaj Serbisë.
Refuzoi të tregojë nëse Policia e Kosovës do t’i tërheqë njësitë speciale nga veriu, por ai është i bindur se ankesat e serbëve për praninë e tyre po pakësohen.
Në fund, Kryeministri i Kosovës, Albin Kurti, e pranoi se nganjëherë ka dallime me aleatët euroamerikanë kur bëhet fjalë për strategjitë, operimet dhe taktikat në terren në njërën anë, dhe kur bëhet fjalë për raportet me Serbinë, por, jo mbi vlerat dhe parimet.
