Kryeministri i Kosovës: Me SHBA jemi aleatë, por s’pajtohemi për çdo gjë!
Kryeministri i Kosovës, Albin Kurti, tha se me Shtetet e Bashkuara jemi partner, aleatë, miq, por kjo nuk do të thotë se pajtohemi çdo herë, në çdo vend, për çdo gjë!
“Unë nuk e kam thënë qëndrimin e asnjë shteti tjetër por si kryeministër i Republikës së Kosovës kam folur që raportet tona, bashkëpunimi jonë me SHBA-në është shumë i mirë, ne jemi partnerë, aleatë, miq, por kjo nuk do të thotë që pajtohemi absolutisht çdoherë në çdo vend për gjithçka,” tha Albin Kurti ndërsa mori pjesë në vënien e gurthemelit të fabrikës së prodhimit të dyerve dhe dritareve në Verbicë të Kmetocit, duke shtuar:
“Në këtë aspekt kemi një Rregullore të re të Bankës Qendrore të Kosovës të cilën Qeveria e Republikës së Kosovës sipas Kushtetutës dhe ligjit, ka për detyrë ta mbështesë, andaj edhe unë them që raportet tona janë shumë të mira dhe i qëndroj kësaj fjale.”
Ndërkohë lidhur me mundësinë e një takimi me Presidentin e Serbisë, Aleksandar Vuçiç, Kryeministri i Kosovës ishte i prerë:
““Nëse na thërrasin për nënshkrim të marrëveshjes padyshim që shkoj. Unë jam treguar konstruktiv dhe i përkushtuar edhe atëherë kur na kanë thirrur në Bruksel, e raundi i bisedimeve nuk mund të thuhet që ka qenë i suksesshëm. Unë këtë e bëj për BE-në, por e bëj edhe për shkak se duhet të kemi marrëdhënie normale me Serbinë.”
Në fund, Kryeministri i Kosovës, Albin Kurti, tha se marrëdhëniet me Serbinë do normalizoheshin qysh në vitin e kaluar, por nëse nuk është bërë në shkurtin dhe marsin e vitit 2023, mund të bëhet në shkurtin e marsin e vitit 2024.
