Kryeministri i luftës: Bota mund të përballet me shock-un më të madh, mungesën e naftës!
Makina ushtarake shqiptarët nuk kishin rastin të shohin sot si në kohën kur ndiqte virusin nëpër bulevard ama retorikën e luftës Kryeministri Edi Rama nuk e ndryshoi si me përmbytjet dhe tërmetet ashtu dhe me pandeminë dhe çmendurinë e Putinit ndërsa publikoi njoftimin e Agjencisë Ndërkombëtare të Energjisë e cila paralajmëron se bota mund të përballet me shock-un më të madh të mungesës së naftës prej dekadash.
“Agjencia Ndërkombëtare e Energjisë lajmëron se bota mund të përballet me shock-un më të madh të mungesës së naftës prej dekadash dhe sapo ka shpalosur një plan të sajin me 10 pika për kursime!” thekson Edi Rama në reagimin e tij përmes rrjetit social Facebook i lumtur që nuk e kishte nisur me ditët pa makina, siç e kishte në një nga pikat e Planit ende të pashpallur, të kursimeve të energjisë e të naftës, sepse sipas tij, do ti ishin hedhur në fyt se e bënte për të sabotuar protestat e turpit!
Ndërsa vazhdoi retorikën e Batonit për protestat edhe me përfaqësues të shoqatave të transportit, bër të ditur se janë 500 milionë lekë për kompensimin e rritjes së çmimit të biletës në transportin publik, që qytetarët përdorues të këtij transporti të mos preken financiarisht nga pasoja e luftës mbi çmimin e karburantit.
Ja postimi i plotë:
Kur bazuar mbi informacione e analiza serioze, unë thashë para ca muajsh duhet vullnet i fortë dhe durim se ka nisur një krizë energjitike e paprecedentë, m’u hodhën në fyt sepse kriza nuk ekzistonte po jam unë që nuk di të qeveris pa kriza!
Njëjtë kur thashë para ca ditësh, po mbi informacione e analiza serioze, se rritja e menjëhershme e çmimit të naftës është shenja e keqe e mundësisë që së shpejti mungesa e naftës të jetë problemi i madh, m’u hodhën në fyt sepse doja të trembja miletin se s’doja të hiqja taksat e naftës!
Po tani që çmimet e naftës në Europë janë mbi tonat e që rritja e tyre krahasuar me këtu është goxha më e madhe me ku ishin çmimet, si shpjegohet?
Ja si shpjegohet nga ky lajm i orës së fundit: Agjencia Ndërkombëtare e Energjisë lajmëron se bota mund të përballet me shock-un më të madh të mungesës së naftës prej dekadash dhe sapo ka shpalosur një plan të sajin me 10 pika për kursime!
Shyqyr se po ta kishim nisur ne me fjala vjen ditët pa makina siç e kishim në një nga pikat e planit tonë ende të pashpallur, të kursimeve të energjisë e të naftës, do të na ishin hedhur në fyt se e bënim për të sabotuar protestat e turpit!
