Kryeministri i Malit Zi nuk shkon në Tuz, Nik Gjeloshaj: Do të ndryshohen masat!
Kryetari i Komunës Tuz, Nik Gjeloshaj, pas takimit me kryeministrin e Malit të Zi, Zdravko Krivokapiç, dhe ministren e Shëndetësisë, Jelena Boroviniç Bojoviç, tha se do të vazhdojnë negociatat me Qeverinë mbi masat epidemiologjike në këtë komunë.
Negociata filluan pasi Kryeministri nuk shkoi në Tuz për të sqaruar situatën me masat e reja epidemiologjike përkundër faktit që Tuzi është përcaktuar si zonë e sigurt jeshile dhe pronarët e bareve dhe restoranteve refuzuan të binden urdhërave të qeverisë.
“Krivokapiç më informoi se nuk do të mbahen bisedimet me përfaqësuesit e komunës Tuz dhe me qytetarët, dhe asgjë nuk më sqaroi,” tha Gjeloshaj duke shtuar se çdo koment është i tepërt dhe se kryeministri iku.
“Mendoj se kemi të bëjmë me një sjellje të papërgjegjshme. Mendoj se duhet të jemi më të përgjegjshëm për dallim nga ai,” tha Nik Gjeloshaj duke paralajmëruar konsultime në komunë dhe hapjen e lokaleve për nesër në përputhje me vendimet e pushtetit lokal.
Ndonëse Gjeloshaj tha se kishte informacione që Qeveria do ta ndryshoj vendimin dhe e përshëndeti, Kryeministri Zdravko Krivokapiç iu përgjigj dhëmbë për dhëmbë!
Nën petkun e Kryeministrit dhe me trurin serb, Zdravko Krivokapiç ngatërroi arsyetimin pse nuk kishte shkuar në Tuz me faktin pse duhet të mbyllen bar-restorantet ndërsa e quajti shfaqje politike.
“Kjo Qeveri nuk do të lejoj askënd që të zbatoj banditizëm, sepse askush nuk mund të jetë më i fortë se shteti. Duhet të insistojmë në përgjegjësi personale të qytetarëve dhe kryetarit të komunës, sepse kjo është shenjë se kujdesemi njëri për tjetrin,” tha Krivokapiç në mesazhin e tij përmes televizionit publik të Malit Zi, RTCG, dhe ndërsa akuzoi Nik Gjeloshajn se problemin shëndetësor do ta shndërroj në politik, ai vetë e bëri një gjë të tillë duke ra në kundërshtim edhe me vendimet e qeverisë së tij që shpallë zonat në bazë të nivelit të sigurisë nga masat e zbatuara dhe i jep vetes të drejtë të penalizoj një komunë me shumicë shqiptare si zonë jeshile, sepse aty mund të vijnë nga komunat tjera:
“Nëse qytetarët e Podgoricës vizitojnë lokalet në Tuz dhe Danillovgrad, atëherë spitali i kryeqytetit do të mbushet plotë me të infektuar nga këto dy komuna. Që kjo të mos ndodhë ne vendosëm këto masa, që nuk janë as ekonomike, as politike por ekskluzivisht shëndetësore,” tha Krivokapiç në mesazhin e tij pa sqaruar se pse qytetarët e Tuzit që kanë zbatuar masat duhet të penalizohen sepse qytetarët e Podgoricës nuk i kanë zbatuar ato.
Ndryshe, mëngjesi në komunën e Tuzit filloi me përplasje pasi u kërkua nga pushteti qendror mbyllja e bar-restoranteve në emër të msave për parandalimin e përhapjes së koronavirusit, gjë që u refuzua nga pushteti lokal i cili ishte i painformuar deri sa u përballë me faktin e kryer.
Për Kryetarin e Komunës Tuz, Nik Gjeloshaj, masat e reja kanë për qëllim hakmarrjen për shfaqjen e fundit të flamurit të Kosovës, me rastin e ditës së pavarësisë së Kosovës më 17 shkurt, dhe jo për të parandaluar përhapjen e koronavirusit.
Gjithsesi, ashtu si në mëngjes edhe për ditën e nesërme kryetari i komunës Tuz, Nik Gjeloshaj, ishte i prerë: Bar-restorantet do të jenë të hapura!
