Kryeministri i platformave online: Do të ndërtojmë shtëpi antisizmike për banorët e prekur nga tërmeti. Mos hyni në gjynah…

Shqiptarët mund të ankohen se qeverisen nga banditë të paskrupullt dhe një njeri që nuk din të qeveris, ama nuk mund të ankohen që ky njeri që është Kryeministri Edi Rama nuk ju ofron kënaqësinë e të pasurit Platforma Online. Këtë kënaqësi do ta kenë edhe qytetarët e prekur nga tërmeti ndonëse janë pa kulm mbi kokë.

Kryeministri Edi Rama tha se çdo familje do të mund të aplikojë në platformë duke marrë një kod përkatës në mënyrë që të përfitojnë nga Programi i Rindërtimit.

Dhe për të treguar se qeverisë me socialistë që vjedhjen e kanë dhunti, Edi Rama u bëri të qartë kryebashkiakëve që kishte përballë se është në dijeni se ka shembuj se si proceset e rindërtimit janë kthyer në historira të turpshme por i garantoi ata se do të ndëshkohen.

“Aspekti ligjor është adresuar plotësisht dhe tani gjitha proceset janë futur në rrugë paralelisht. Do të thotë që për të rindërtuar ne nuk mund të sillemi si individët që ndërtuan pa eleje vitet e mëparshme. Ne kemi nevojë për të planifikuar në bazë të të gjitha komponentëve teknike. Nëse themi do të ndërtojmë këtu në zonën e Thumanës apo Laçit ku projektet kanë avancuar, duhet të bëjmë një studim gjeologjik të terrenit.

Në 60 ditë ne kemi bërë një volum pune që krahasuar me eksperiencat e vendeve të tjera, është një volum shembullor. Eksperienca e vendeve të tjera ka shumë pamje. Ne kemi Italinë fiqnje, një nga vendet më të industrializuara të botës, ka sot që flasim edhe shembuj të rindërtimit me një kapërcim cilësor në raport me tërmetin. Ka edhe shembuj që edhe pas 15 vjetësh, familjet ndodhen në kabina. Ky nuk do të jetë rasti ynë. E them këtë për të treguar se procesi është shumë kompleks. Paralelisht me studimet përkatëse pasi janë identifikuar në kohë rekord zonat e rindërtimit.

Ne do të bëjmë shtëpi që do të bëjnë diferencën me të shkuarën. Në vend se të rindërtojmë në mënyrë të shpërndarë ashtu siç është ndërtuar rëndom në Shqipëri, por duam të krijojmë komunitete. Ka pasur komunikim me banorët që kanë humbur shtëpitë në zonat rurale dhe t’u themi pse ka një avantazh që të spostohen nga shtëpitë ekzistuese në qendërza në komunitet.

Prona e tyre dhe që sot jetojnë në çadrën e ngritur në oborrin e shtëpisë, do të jetë pronë e tyre ndërkohë që do të marrin shtëpitë e tyre në një pronë që nuk është e tyre por që do të jetë e tyre. Nëse sot shtëpitë i kanë në distancë nga shërbimet.

Shtëpitë e reja në zonat rurale duhet të jenë antizismike. Nëse ndodh një tjetër lëkundje e fortë, shtëpitë të jenë antizimike dhe ndërkohë të garantojnë cilësi jete. Pallatet të jenë shembullore nga pikëpamja e parametrave duke filluar nga antisizmikja. Shumë shpejt do të kemi modelet e zhvillimit, që do të thotë tipologjitë e shtëpive që do të ndërtohen në zonat rurale sipas volumeve arkitektonike të parashikuara për të garantuar një jetë më të mirë.

Mjafton që familja të bëjë aplikimin dhe të marrin një kod dhe nga Smartfoni do të mund të ndjekë se ku është projekti i vet.”

Duke konstatuar se në program janë futur familje me padrejtësi, Kryeministri Edi Rama tha se ata do të ndëshkohen sepse ky nuk është një proces për të bërë qoka.

“Ka shembuj se si proceset e rindërtimit janë kthyer në historira të turpshme. Për të evituar këtë dhe për të garantuar që asnjë qytetar të mos mbetet vetëm ne kemi ndërtuar këtë platformë transparente, ku bashkitë do të kenë regjistrin e tyre elektronik të të gjithë familjeve në nevojë për programin e rindërtimit dhe ku çdo familje do të ketë akses individual për të ndjekur gjithë procesin.

Në programin që do të plotësojë platformën do mund të ndiqet i gjithë procesi i rindërtimit vizualisht. Kështu garantohet që zyrat e bashkive nuk mund t’i ikin më përgjegjësisë, ashtu si dhe zyrat e shtetit, pasi është shteti i tëri që të shikon. Do të ndëshkohen të gjitha rastet, nëse do identifikohen se në procesin e rindërtimit janë futur familje që nuk e meritojnë. Ky nuk është proces për të bërë qoka, apo për të strehuar njerëz që nuk janë strehuar nga tërmeti, ky është proces për të prekurit nga tërmeti,” tha Edi Rama ndërsa falënderoi kryebashkiakët iu bëri të qartë:

“Mos hyni në gjynah, bëjeni këtë punë njësoj sikur do të ishit ju që do të mbeteshit pa shtëpi. Mos merrni iniciativa individuale për të regjistruar si të prekur nga tërmeti njerëz që nuk janë prekur, se do të ndëshkoheni, pasi do monitoroheni nga një grup që s’e njihni. Kryebashkiakëve ju them faleminderit, sepse iu ka rënë mbi kokë një hall i madh, që e kanë përballuar me dinjitet, por që duhet t’i qëndrojnë në kokë, që regjistri elektronik i familjeve të jetë shembullor dhe aty të jenë të gjithë ata që kanë nevojë. Të gjitha do të monitorohen dhe kush do të kapet duke abuzuar, do të ndëshkohet.”