Kryeministri i Republikës Srpska, Radovan Vishkoviç jep dorëheqje
Kryeministër i entitetit të Bosnje Hercegovinës, Republika Srpska, Radovan Vishkoviç, dha sot dorëheqje.
Radovan Vishkoviç, raporton RFE, është anëtar i Aleancës së Socialdemokratëve të Pavarur, SNSD, të udhëhequr nga Milorad Dodik.
Vishkoviç është një nga të dyshuarit në hetimin e Prokurorisë së Bosnje Hercegovinës për veprën penale të sulmit ndaj rendit kushtetues.
Për të njëjtën vepër akuzohen edhe Dodik, president i Republikës Srpska, si dhe Nenad Stevandiç, kryetar i parlamentit të entitetit.
Nuk janë bërë të ditur arsyet pse Vishkoviç dha dorëheqje, por vetëm u njoftua se do të zgjidhet një qeveri e re e Republikës Srpska.
“Kjo është një ditë që e kam pritur qysh kur u emërova kryeministër i Republikës Srpska. Ky është edhe kontributi im për një konsensus sa më të gjerë në Republikën Srpska,” tha Vishkoviç në një konferencë për media, pas një takimi në selinë e presidentit të entitetit.
Ai shtoi se “mbetet pjesë e ekipit të SNSD-së”.
Dodik, kryetar i SNSD-së, njoftoi se Vishkoviç do të vazhdojë punën si drejtor i Autostradave të Republikës Srpska.
Në krye të Qeverisë së Republikës Srpska, Vishkoviç ishte që nga viti 2018, ndërsa mandatin e tij opozita shpesh e ka kritikuar për mënyrën e menaxhimit të resurseve të entitetit, për dhe qasjen ndaj institucioneve të Bosnje Hercegovinës.
Që nga korriku i vitit 2023, Radovan Vishkoviç gjendet në listën e sanksioneve të Shteteve të Bashkuara për shkak të kërcënimeve ndaj Marrëveshjes së Paqes së Dejtonit, dhe cenimit të sovranitetit të Bosnje Hercegovinës.
Departamenti amerikan i Thesarit, tha se Vishkoviç është një nga udhëheqësit në Republikën Srpska, i cili mban përgjegjësi “për nxitjen e miratimit të ligjeve në Kuvendin Popullor të Republikës Srpska, me të cilat vendimet e Gjykatës Kushtetuese të Bosnje Hercegovinës shpallen të pazbatueshme në RS, duke penguar dhe rrezikuar kështu zbatimin e Marrëveshjes së Daytonit”.
Këto sanksione, raporton RFE, përfshijnë ndalimin e hyrjes në SHBA dhe ngrirjen e pasurisë që gjendet nën juridiksionin e tyre.
