Kryeministri ma i mirë prej krejtve!
nga Agim Popoci
Sot kur Paketa Antishpifje quhet e miratuar nga Parlamenti i Shqipërisë dhe pritet të bëhet e plotfuqishme me shpalljen në Fletoren Zyrtare, kur viktimat e kësaj Pakete, gazetarët, me keqardhje konstatuan se dje në protestë nuk ishin asnjëri prej atyre kundërshtarëve të zëshëm të kësaj Pakete, ustai më i mirë i përdorimit të mediave prej gjithë kësaj bande kriminale mediatike na del, ai i cili i përdori për të ardhur dhe vazhdon ti përdor për të qëndruar i fortë në pushtet, Edi Rama!
Dhe jo vetëm kaq! Nëse analizojmë gjithë parashtrimin e ditëve deri në seancën plenare të 18 Dhjetorit, procesi i turpshëm i votimit të djeshëm dëshmon se Edi Rama, përkundër konkurrencës së fortë, është deputeti më i mirë prej krejtve edhe në këtë Parlament të turpshëm të Shqipërisë!
Deri sa e gjithë vëmendja e opinionit publik ishte përqendruar tek Paketa Antishpifje, askush nuk pyeti Kryeministrin PSE por miratoi zgjatjen e gjendjes së jashtëzakonshme deri më 31 mars. Edi Rama nuk është se çanë kokën për atë që nxjerr nga goja, por Parlamenti ishte vendi ku Kryeministri zyrtarisht duhet të sqaronte akuzat që vazhdojnë dhe vinë nga banorët e zonave të prekura nga tërmeti. Vërtetë hyzmeqarët socialist, ballist, zogist dhe konservatorë të Edi Ramës, mund ti besojnë ERTV-së por meqë janë përfaqësues të popullit, ata duhet të denjonin ta pyesin pse dora e shtetit ende nuk ka mbërri tek banorët e prekur nga tërmeti i 26 Nëntorit; Qoftë kjo edhe gjendja e jashtëzakonshme më e mirë prej krejtve!
Vërtetë protesta e gazetarëve para Parlamentit dje ishte njëkohësisht edhe turp për shtetin shqiptar me Qeverinë dhe Kryeministrin që ka, por nga ana tjetër ajo që ndodhi brenda Parlamentit dhe mënyra se si u miratua Buxheti 2020, në historinë e parlamentarizmit shqiptar do të shënohet si dita më e turpshme. 90 zogjtë e Edi Ramës, që debat bëjnë edhe me familjarët e tyre për buxhetin e shtëpisë, dje nuk u dëgjuan fare dhe i thanë PO buxhetit që e kishte menduar shpurra e Kryeministrit, si buxheti më i mirë prej krejtve.
Arben Malaj mund të bëjë shumë pak dallim nga çdo zog i Edi Ramës duke pasur parasysh mënyrën se si u fut në Këshillin Mbikëqyrës të Bankës së Shqipërisë; Por, dje Arben Malaj, ndonëse iu dha mundësia nga foltorja e Parlamentit të Shqipërisë ti tregoj opinionit publik se kush është Edi Rama, ai nuk e bëri këtë gjë. Mënyra e shkarkimit është shumë e diskutueshme por edhe në këtë përleshje ndërsocialiste mes një Ish-Ministri të rëndësishëm dhe Kryeministrit aktual, që vijnë nga partia kriminale PPSH, sejmeni më i mirë socialist prej krejtve na del Edi Rama.
Për të mos u mjaftuar me kaq, Kryeministri Edi Rama largoi nga drejtuesi i AKEP edhe Ish-kryetarin e FRESSH, Ilir Zelën, edhe pse ky i fundit e “shiti” si dorëheqje. Zogjve socialistë kjo nuk u pengoi që pa një të keqe ta votojnë largimin e Ilir Zelës ndonëse kishim të bëjmë me një drejtues të shquar të FRESSH kur ajo ishte një bandë e mirëfilltë kriminale. Kur FRESSH drejtohej nga Ilir Zela, uji, ajri dhe toka drejtohej nga rinia socialiste; Në çfarë mënyre, këtë e konfirmon shitja e pasurisë shtetërore edhe pa PPP dhe regjistrimi në shkollën e lartë pa asnjë portal! Por, Ilir Zela deri dje ishte Kryetari i FRESSH-it më kriminal dhe të gjithë i referoheshin si lideri i rrallë i kësaj organizate por sot nuk është as fresshisti më i mirë prej krejtve!
Sot, dje dhe deri sa të ekziston shteti shqiptar, nuk do ta kuptoj askush se pse i ngjiti Arben Ahmetaj, Kryeministrit Edi Rama. Akuzat e shumta ndaj Ahmetajt dhe paaftësia e tij për të kuptuar qoftë edhe një term fiskal mund të jenë arsyet se pse sot Arben Ahmetaj u gdhi ministër i Rindërtimit, por nga të gjithë liderët socialist të akuzuar si hajdut dhe moskokëçarja që reflekton pa arsyetuar asnjë qindarkë Edi Rama, Arben Ahmetaj, përkundër zellit të treguar nuk na del hajduti socialist më i mirë prej krejtve!
Dhe në fund Presidenti i Republikës! Vërtetë dje vëmendja ishte përqendruar tek Paketa Antishpifje dhe rezistenca që bënë gazetarët deri në minutën e fundit, por frika e Ilir Metës për tu shprehur kundër kësaj pakete ligjore ishte frikshme. Gjatë përplasjeve të sajuara Rama-Meta, mileti vërtetë mori anën e njërit apo tjetrit, duke i cilësuar si të paskrupullt ose gardian të Kushtetutës, në vartësi nga përcaktimi politik.
Por, askush nuk e ka menduar, duke pasur parasysh edhe të kaluarën politike të Ilir Metës, ku shquhet si shtypësi “par excellence” i demokratëve, gazetarëve që i mbështetën dhe Partisë Demokratike në tërësi si, se do të vijë dita që pas përdorimit të analistëve “Made in Sandri”, mbylljes me Ligj të gojëve të të gjithë gazetarëve, dhe mbylljes pa ligj të gojës së Presidentit të Republikës, se shkronjësi i fjalimeve të Ish-Kryeministrit Meta, Edi Rama, do të bëhet Kryeministri më i mirë prej krejtve!
