“Kryeministri”, Mustafa: LDK nuk e kërkon sepse…

Deri sa deklaratat kundër Kryeministre Vjosa Osmanit kanë vazhduar nga Lëvizja Vetëvendosje, Kryetari i Lidhjes Demokratike të Kosovës, Isa Mustafa, u munuda të bindë partnerët me të cilët mendon të bëjë koalicion, se LDK nuk e kërkon Kryeministrin sepse nënvlerëson Albin Kurtin dhe meritat e tij, por se vlerëson VjosaOsmanin dhe kërkesat e anëtarësisë, kompetencën e LDK-së, ekipin e saj, për qeverisje të mire e pa korrupsion.

“Jam angazhuar, i mbetem besnik idesë dhe përkushtimit që vendi të qeveriset nga partitë e deritanishme opozitare, LDK dhe Vetëvendosje. Në situatën në të cilën gjendemi, këtë e konsideroj zgjidhjen më të mirë.
 Sikurse LDK, ashtu edhe Lëvizja Vetëvendosje ka specifikat e veta. Ka njerëzit me të cilët llogarit fitoren dhe qeverisjen. Kanë ambientin e brendshëm, që dallon,” thekson Isa Mustafa në reagimin e tij përmes rrjetit social Facebook duke shtuar se nuk i jep të drejtë LDK-së të përzihet se kush nga VV duhet të jetë Kryeministër i vendit; Por, nuk i jap të drejtë as VV të caktojë sesi LDK duhet të vendosë për Kryeministrin dhe për njerëzit e fushatës.

“Bashkëpunimin e konsideroj proces të respektit reciprok. Kam gëlltitur të kaluarën, sepse e kam vlerësuar më lart interesin e vendit sesa vetëveten. Jemi shprehur pozitivisht për koalicion me VV në interes të forcimit të shtetit dhe dekriminalizimit të vendit.”

Në qoftë se jemi të bindur se edhe njërës edhe tjetrës palë i takon Kryeministri, thekson Kryetari i LDK-së, Isa Mustafa, kjo nuk do të thotë se duhet të hapim frontin ndërmjet veti ndërsa përfundon:

“Kemi plot gjëra të mira që mund t’ia adresojë njëra palë tjetrës për bashkëpunimin tonë, por kemi edhe të këqia. Kjo nuk është mënyrë që ne të tentojmë të fitojmë vota. Më shumë preferoj të ndërtojmë front të përbashkët, para ose pas-zgjedhor, për t’ua pamundësuar PAN-ave dhe përkrahësve të tyre vazhdimin e shkatërrimi të shtetit.”