Kryeministri: Protestë e PD, jo hallexhinjve/ Përgjigjet Basha: Edi Rama është një hajdut, do të…

Edi Rama është një hajdut, sepse do të vjedhë 40 milionë euro, duke shkelur ligjin. Kështu i përgjigjet Edi Ramës, kryetari i PD, Lulzim Basha, nga protesta e banorëve të Unazës së Re që preken nga projekti i Unazës së Madhe, pas deklaratës së kryeministrit se kjo nuk është një protestë e hallexhinjve por protestë e Partisë Demokratike dhe e opozitës, duke shtuar:

“Edi Rama është një hajdut, sepse do të vjedhë 40 milionë euro, duke shkelur ligjin, duke shkelur ligjin e prokurimeve, duke shkelur ligjin e legalizimeve, duke shkelur kushtetutën, duke shkelur ligjet për shpronësimet. Ky nuk është projekt për qytetin e Tiranës, ky është projekt për Vilën e Surrelit. Agai i Surrelit do që me një të rënë të lapsit, të marrë 40 milionë euro, pasi pazaret i ka bërë kokë për kokë, është ulur ai kokë më kokë për të bërë pazaret e tenderit, për të vjedhur 40 milionë euro. Ndërsa ne jemi këtu në krah të këtyre njerëzve për t’i mbështetur dhe për të denoncuar këtë megavjedhje.”

Duke qenë pjesë e protestës tek Unaza e Re, interesimi i mediave ishte se çfarë ka bërë opozita për ata dhjetëra protestues që janë shoqëruar nga policia, ku janë shoqëruar këta protestues, dhe çfarë do bëhet në vijim, Lulzim basha sqaroi:

“Ne jemi 24 orë pranë tyre, kudo ku ata janë shoqëruar ka pasur deputetë të opozitës, u kemi ofruar ndihmë ligjore dhe u kemi ofruar familjarëve të tyre gjithë solidaritetin, ndihmën dhe mbështetjen tonë, shpirtërore, ligjore dhe të gjithanshme.”

Por mediat me porosinë e kryeministrit, duke e munduar me bombardimin me pyetje ta paraqes kreun e opozitës në protestë si diçka të panatyrshme, morën edhe një përgjigje të natyrshme pasi u pyet për gjithçka, për ujin, ajrin dhe çmenduritë e Edi Ramës, dhe në fund edhe nëse ka ndryshime gjatë këtyre 24 orëve, a ka ndryshuar situata:

“Ka ndryshuar. Po ju s’keni hetuar fare për këtë punë, prisni të vij unë t’jua them? Hetojini dhe ju se sa janë, sa janë liruar, se kush janë këta persona, pse janë ndaluar. Bëni edhe ju punën tuaj, mos prisni të vij unë t’jua them gjithçka.

Qytetarët nuk duhet të presin që kjo e keqe të vijë në dyert e tyre, por duhet të bashkohen këtu, sepse kjo betejë nuk është vetëm për këta protestues dhe familjet e tyre, por është për të gjithë qytetarët. Shikoni, ato 40 milionë euro që do të marrë agai i Surrelit, se ky është projekt i Vilës së Surrelit, nuk është projekt i qytetit të Tiranës. Kjo është megavjedhje. Nuk ka në analet e historisë së infrastrukturës botërore, ky është kandidat për librin Guiness për vjedhjen që po bëhet këtu, dhe kjo vjedhje bëhet drejtpërdrejt nga Edi Rama. Pse nuk është bërë prokurimi? Sepse ky vetë është ulur kokë më kokë me ato 3 kompanitë dhe u ka thënë: ti do marrësh kaq e unë kaq. Kështu me të dytin e kështu me të tretin. Ky është projekt i Vilës së Surrelit. Vila e Surrelit do të lërë këta vogëlushë pa shtëpi. Për Vilën e Surrelit, për xhepat e tij, për pasurinë e tij, i ka traumatizuar gjithë këta familjarë.  Pra, ka treguar se është në gjendje që të shkelë jo vetëm mbi ligjin e kushtetutën, por mbi sigurinë e këtyre familjeve, mbi jetën e këtyre vogëlushëve, prandaj u them gjithë shqiptarëve: Ngrihuni, sa nuk është vonë, këtu dhe kudo që të jenë!”

Dhe në fund, i pyetur se çfarë do t’i sugjeroj banorëve të Astirit, pas protestës së djeshme, kryetari i Partisë Demokratike, Lulzim Basha u shpreh:

“Unë nuk kam nevojë t’u sugjeroj asgjë banorëve të Astirit. As unë e as ju. E dinë vetë se çfarë bëjnë. Një gjë ju kam thënë, do të jemi në krah të tyre dhe jemi në krah të tyre.”

Ndryshe, kryetari i PD, ashtu siç kishte paralajmëruar, ishte në mesin e banorëve të Unazës së Re që preken nga projekti i Unazës së Madhe dhe vazhdojnë të protestojnë duke kërkuar dëmshpërblim 100 %.

“Unë do të jem bashkë me ata. Do të ngrihemi me këta njerëz edhe sikuru padrejtësia të kufizohet vetëm me këta. Po mos prisni se atëherë do të jetë shumë vonë, kur padrejtësia t’ju vijë tek dera,” parlajmëroi sot në mesditë kryetari i PD, Lulzim Basha.