Kryeministrja e Britanisë së Madhe, Liz Truss, jep dorëheqjen

Vetëm 45 ditë pasi mori drejtimin e qeverisë, Kryeministrja e Britanisë së Madhe, Liz Truss, dha dorëheqjen.

Duke shpallur dorëheqjen ajo tha se kishte një vizion për një ekonomi me taksa të ulëta dhe me rritje të lartë ekonomike ndërsa detyrën e kishte marrë në momentin e destabilitetit të madh ekonomik dhe ndërkombëtarë.

Liz Truss tha se i ka paraqitur dorëheqjen Mbretit dhe se zgjedhjet për kryetarin e ardhshëm të Partisë Konservatore do të zhvillohen javën e ardhshme.

Kështu, Liz Truss bëhet kryeministrja me mandatin më të shkurtër në historinë e Britanisë së Madhe, duke dhënë dorëheqjen vetëm gjashtë javë pasi mori detyrën.

Ndryshe, kjo dorëheqje e Truss vjen pas tensioneve që u krijuan dje në parlamentin britanik ndër deputetët konservator me rastin e një votimi të dështuar, që u konsiderua dhe si votëbesim i qeverisë.

Liz Truss luftoi për mbijetesë politike që nga 23 shtatori kur ministri i saj i Financave, Kwasi Kwarteng, paralajmëroi një “mini buxhet” me reduktime të mëdha tatimore, që tronditi dhe tregjet financiare. Pas këtij paralajmërimi u rrit dhe shpenzimi britanik i borxheve duke kërcënuar tregjet e pasurive të paluajtshme dhe rritjes shtesë të shpenzimeve jetësore. 

Më pas qeveria hoqi dorë nga këto propozime, që krijoi dhe një sfidë shtesë për qëndrimin e Truss në pushtet. Një pjesë e deputetëve hapur i bënë thirrje të dorëhiqet, ndërsa të tjerët filluan të diskutojnë se kush mund ta zëvendësoj Liz Truss.