Kryengritja e Postribës, Berisha: Sot, pas 76 vitesh, Shqipëria sërish në rrezik nga një cub pa moral!

Në 76-vjetorin e Kryengritjes së parë antikomuniste në Shqipëri dhe Evropë, Kryetari i PD-së, Sali Berisha, tha se luftëtarët e lirisë të Postribës dhe Shkodrës, vendosën t’i përgjigjen me rezistencë të armatosur, me kryengritje, një pushtimi barbar që do instalohej në Shqipëri më 28 nëntor 1944.

Sot, përsëri pas 76 vitesh Shqipëria është në një rrezik të madh, tha Sali Berisha, sepse po përjeton vendosjen e monizmit, të pushtetit të një partie, të përqendruar në duart e një cubi që s’ka moral, s’ka nder, s’ka asgjë, që vjedh e plaçkit qytetarët dhe ky është Edi Rama.

“Luftëtarët e lirisë të Postribës dhe Shkodrës, 76 vjet më parë vendosën t’i përgjigjen me rezistencë të armatosur, me kryengritje, një pushtimi barbar që do instalohej në Shqipëri më 28 nëntor 1944. Ky pushtim për shqiptarët ishte i dyfishtë në ato vite. Ishte pushtimi i vendosjes së diktaturës komuniste të Enver Hoxhës dhe unë u rikujtoj ju këtu, u rikujtoj shqiptarëve që vrasësi serial që komandoi hordhitë partizane që vërshuan në Shkodër dhe në veri Mehmet Shehu do t’i shkruante Enver Hoxhës se në kuptimin ushtarak, Shkodrën e vendosëm nën pushtim.

Ai thotë një të vërtetë të pamohueshme, por të tillë pushtim e konsideruan qytetarët e Shkodrës, Malësisë së Madhe, Dukagjinit dhe Veriut në tërësi. Por krahas këtij pushtimi, Shkodra, Shqipëria ishin në një pushtim të dytë,” tha Berisha duke kujtuar ditët kur në Shkodër u vendosën zyrat e shërbimit famëkeq jugosllav, OZNA, i cili grabiste dhe zhdukte nacionalistët e Shkodrës dhe veriut.

“At Zef Pllumi përshkruan 28 nëntorin në ndërrimin e simboleve, u hoq flamuri kombëtar dhe u vendos flamuri jugosllav. Në Shkodër u vendosën zyrat e shërbimit famëkeq jugosllav, i cili grabiste dhe zhdukte nacionalistët e Shkodrës dhe veriut, i bindur se ata nuk do pranonin pushtimin serb barbar të Shqipërisë. Në këtë kontekst kryengritja e Postribës, kryengritja e parë antikomuniste në Evropë, ishte një kryengritje për liri, e atdhetarëve patriotëve të cilët donin një Shqipëri të lirë nga diktatura komuniste dhe padronët e tyre jugosllavë. Sot ne nderojmë veprën heroike të burrave dhe grave të Postribës. Shumë prej tyre u ekzekutuan me gjyq e pa gjyqe për fajin e vetëm se po luftonin për liri, fshatra të tëra u dogjën, mbi 1000 e ca banorë u internuan në kampet e zeza.”

Ndërsa, sot, pas 76 vjetësh, tha Berisha, Shqipëria sërisht është në rrezik të madh kur pushteti i një partie po përqendrohet në duart e një cubi që s’ka moral, s’ka nder, s’ka asgjë që vjedh e plaçkit qytetarët dhe ky është Edi Rama.

“Por sot përsëri pas 76 vitesh Shqipëria është në një rrezik të madh sepse përjeton vendosjen e monizmit, të pushtetit të një partie, të përqendruar në duart e një cubi që s’ka moral, s’ka nder, s’ka asgjë që vjedh e plaçkit qytetarët dhe ky është Edi Rama. Përdor çdo fatkeqësi ndaj tyre për t’i shtypur, vjedhur më shumë. Çfarë bëri me COVID-in nxori tanket, nga ana tjetër vidhte natë dhe ditë taksat ndaj dhe vdekshmëria e shqiptarëve shkoi në qiell. Me rritjen e çmimeve fiton qindra miliona, qyt i mashtron me thërrime. Sot përsëri Postriba është në rrezik, Shqipëria është në rrezik.

Duke u përkulur me nderimin më të madh për heroizmin e burrave të Postribës, le të zotohemi përpara këtij monumenti, se do të mbrojmë idealet e tyre të lirisë dhe Shqipërinë do e shpëtojmë nga ky regjim armiqësor, i egër, hajdut që po shkatërron çdo ditë qenien shqiptare,” tha Kryetari i PD, Sali Berisha duke përfunduar:

“Ju ftoj të vazhdojmë qëndresën tonë gjer në përmbysjen përfundimtare të një armiku të egër që quhet Edi Rama.”