Kryeprokurori Isufaj kërkoi nga Qeveria përkushtim ndaj sundimit të ligjit por jo nga Prokurorët! 

Ndonëse për mungesën e sundimit të ligjit në Kosovë janë akuzuar vetë Prokurorët njëri prej të cilëve u arratisë pas kërcënimit nga mafia, sot Kryeprokurori i Prokurorisë Speciale, Blerim Isufaj, kërkoi nga Qeveria që të tregojë përkushtim ndaj sundimit të ligjit dhe ta shmangë retorikën që synon politizimin e drejtësisë. 

Në këtë situatë, Kryeprokurori i Prokurorisë Speciale, Blerim Isufaj, nuk angazhohet për të përmirësuar sitiuatën por kritikon Qeverinë pse Kryeministri nuk i përgjigjet ftesës për tu marrë në pyetje si person në dijeni madje shpreh habinë me ofertën e Albin Kurtit dhe shton se nuk e di nëse është intervistuar dikush ndonjëherë në Zyrën e Kryeministrit, ashtu siç ka kërkuar kryeministri aktual, Albin Kurti, të japë dëshminë e tij, të kërkuar nga Prokuroria Speciale.

“Ligji është i njëjtë për të gjithë qytetarët e Republikës së Kosovës, përfshirë edhe zyrtarët e lartë shtetërorë. Ftesa për dhënie të dëshmisë është procedurë e rregullt dhe çdo person që ftohet ka përgjegjësi ligjore të bashkëpunojë me institucionet e drejtësisë, andaj u bëj thirrje të gjitha institucioneve, përfshirë edhe Qeverinë e Kosovës që të tregojë përkushtim ndaj sundimit të ligjit dhe të shmangin retorikën që synon politizimin e drejtësisë. Nuk jam këtu për të komentuar deklaratat e askujt se fare nuk më interesojnë, po flas atë që unë di dhe që mendoj se duhet bërë,” tha Isufaj ndonëse drejton njërin ndër institucionet më të politizuara në Kosovë ndërsa foli dhe për deklaratat denigruese dhe fyerjet ndaj prokurorëve që, sipas tij, minojnë integritetin dhe sistemin e drejtësisë. 

“Sistemi Prokurorial dhe ai Gjyqësor nuk janë për të bërë skenarë, ne punën tonë e kemi të përcaktuar me ligj dhe Kushtetutë dhe nuk bëjmë dallime as për nga pozita as për nga emërimi. Unë nuk kam informacione nëse ndokush ndonjëherë është intervistuar në zyrën e Kryeministrit, ndoshta edhe mund të ketë, por unë nuk e di. Në këto pesë vjet sa jam kryeprokuror i kësaj prokurorie, raste të tilla nuk ka pasur. Deklaratat denigruese dhe fyerjet ndaj prokurorëve dhe Prokurorisë jo vetëm që minojnë integritetin dhe sistemin e drejtësisë, por e cenojnë edhe besimin e publikut në sundimin e ligjit.” 

Viti që po lëmë pas, tha Kryeprokurori i Prokurorisë Speciale, Blerim Isufaj, ka qenë sfidues. Prokuroria Speciale është marr me raste komplekse dhe delikate, duke punuar pa kompromis.

“Këto sfida nuk janë profesionale por edhe morale. Angazhimi me partnerët ka qenë një shtyllë themelore. E kuptojmë se suksesi PSRK është me avokat, polic etj. Synimi jonë është të promovojmë barazinë para ligjit,” tha Kryeprokurori i Prokurorisë Speciale, Blerim Isufaj, duke u munduar ta bind opinionin publik se lufta kundër korrupsionit ka qenë dhe mbetet prioritet ndërsa konstatoi se hetimi dhe ndjekja e krimit të organizuar është intensifikuar.

Ndryshe, Kryeministri i Kosovës, Albin Kurti nuk i është përgjigj më 16 dhjetor ftesës së Prokurorisë Speciale për t’u paraqitur në zyrat e saj për të dëshmuar lidhur me rastin e rezervave të shtetit, në të cilin, sipas Prokurorisë është e përfshirë edhe ministrja e Industrisë, Ndërmarrësisë dhe Tregtisë, Rozeta Hajdari.

Albin Kurti ka ftuar prokurorët të shkojnë në zyrën e tij në Kryeministri për ta marrë në pyetje si dëshmitar.

Në gusht të vitit 2023 u arrestuan disa persona nën dyshimet për keqpërdorime me rezervat shtetërore. Pas ftesës për intervistim në Prokurorinë Speciale, nën dyshimet se ka keqpërdorur detyrën zyrtare në lidhje me rezervat shtetërore, ministrja Hajdari ishte mbrojtur në heshtje para prokurorëve.