Kryesia e PD, Berisha: Protestë e gjatë dhe e qëndrueshme, shkatërrimtare për këtë regjim!
Ndonëse tha që në fillim se Kryesia ishte mbledhur për miratimin e grupeve të punës që do të drejtojnë dhe ndjekin në bazë aksionin politikë të Partisë Demokratike, Kryetari i PD, Sali Berisha,duke konstatuar se qytetarët kanë pritshmëri shumë të larta nga PD, paralajmëroi protestë të gjatë dhe të qëndrueshme si shkatërrimtare për këtë regjim.
“Sot, për fat të keq, institucionet e këtij shteti të mafies, janë shndërruar në sera që përgatisin hajdutë zyrtarë. Kur e them këtë, e them jo për të injoruar që në administratën shtetërore ka njerëz të ndershëm, por e vërteta është se qindra e qindra firma që hidhen në dokumente, është e pamundur të gjesh qoftë edhe një që është në përputhje me ligjin dhe transparencën. Kjo ndodh sipas një ligji të njohur: kur kryeministri vjedh, vjedhja shndërrohet në sistem. Kur kryeministri del mbi ligjet, të tjerët me vrap i mbikalojnë ato.
Kështu që e transformuar në një makineri gjigante vjedhje, asnjë ligj dhe institucion nuk e ndalon më këtë makineri. Vjedhja e pronës publike, kulmon me aferat gjigante të Portit të Durrësit dhe Parkut të Butrintit. Vjedhja e qytetarëve me çmime të prokurimeve publike bëhet gjithnjë e më e madhe. Rrugët po ndërtohen me çmime tetë herë më të larta, dhjetë herë më të larta se çmimet e bazuara në manualet e ndërtimit të BE-së. Nuk ka ligj, nuk ka manual, nuk ka asgjë që mund të ndalojë Edi Ramën dhe grupin e tij në vjedhjet e papërmbajtura. Edi Rama po e ndërron Shqipërinë, fund e krye si çifligun e tij,” tha Sali Berisha para Kryesisë së PD duke paralajmëruar katastrofën energjetike që po përgatit Edi Rama.
“Edi Rama po përgatit katastrofën energjetike duke shkelur ligjet e vendit, që mbrojnë digat, që nuk lejojnë zbrazjen e digave deri në datën 1 shtator nën nivelin 284 metër. Sot digat janë nën 270 metër. Për dy arsye: Duan të sjellin errësirën, që të justifikojnë aferën e tmerrshme të kontraktimit të dy gjeneratorëve gjigantë nga Bangladeshi, të cilët shpenzojnë 520 mijë euro naftë dhe kanë qira ditore prej 92 mijë eurosh. Ky i zbraz digat, por ky gjeneratorë që punojnë me mazut, me përqindje të tmerrshme squfuri, që për Vlorën janë sikur të fusësh 100 mijë automjete që bëjnë 100 kilometra ccdo ditë në Vlorë, për mjedisin e saj, një prokurim pa tender. Një kompani gjigante.”
Duke paralajmëruar protestë të gjatë dhe të qëndrueshme, si shkatërrimtare për këtë regjim, Berisha tha se do ngrihen kundër këtij regjimi me besimin më të madh se shqiptarëve do u kthejmë të drejtën e votës.
“Ata presin veprimet e frontit për shpëtimin e Shqipërisë dhe ne jemi të vendosur të bëjmë gjithçka për t’u dalë zot dhe për të mbrojtur interesat e qytetarëve shqiptarë. Protesta e gjatë dhe e qëndrueshme, shkatërrimtare për këtë regjim, është jetike dhe vendimtare për të ecur në rrugën e demokracisë.
Përgjigjia popullore ndaj tyre është rruga më jetike, më e domosdoshme. Dhe është detyra jonë që këtë mesazh ta përcjellin në çdo zemër, në çdo votër, në çdo derë të shqiptarëve. Ky pushtet është pushteti i dhunimit të votës. Askush nuk mund t’u diktojë shqiptarëve që të pranojnë një pushtet që vjen nga vota e dhunuar nga terroristët e kuq të votës, patronazhistët.
Askush nuk mund të diktojë që shqiptarët të pranojnë një pushtet të grabitur. Jo, ne ngrihemi kundër këtij regjimi me besimin më të madh se shqiptarëve do u kthejmë të drejtën e votës. Edi Rama do marrë të gjitha mësimet që meriton për dhunimin që i ka bërë votës së shqiptarëve.” tha Kryetari i PD ndërsa ritheksoi se primaret janë dritë shprese për shqiptarët iu kthye dhe çështje për të cilën ishin mbledhur, miratimin e grupeve të punës që do të drejtojnë dhe ndjekin në bazë aksionin politikë të Partisë Demokratike
“Ne si PD kemi fillimin e fushatës elektorale për zgjedhjet lokale. Imagjinoni ju, se çfarë rëndësie jetike kanë procedurat demokratike që bëjmë ne, në një shtet mafioz ku shkelmohet vota, ku partia rivale ka ndaluar votën brenda saj. Këto primare dhe kjo procedurë janë dritë shprese për demokracinë dhe shqiptarët. Mbahen në kushte shumë të vështira, por kanë shpirtin e pluralitetit në vete, kanë fundin e kryetarokracisë. Duhet të bëjmë gjithçka për një procedurë sa më transparente të zgjidhen kandidatet më të mirë me votën e lirë,” tha Kryetari i PD, Sali Berisha, duke bërë të ditur dhe emrat e Kryetarëve të Grupeve të Punës që do të drejtojnë dhe ndjekin në bazë aksionin politik të Partisë Demokratike:
Qarku Kukës – Isuf Çela; Qarku Dibër – Xhelal Mziu; Qarku Shkodër – Bardh Spahia; Qarku Lezhë – Jozefina Topalli; Qarku Durrës – Oerd Bylykbashi; Qarku Tiranë i ndarë në 5 zona. Zona 1 – Kryetar Grupi Edi Paloka dhe përfshin degët 1, 2, 3, 4; Zona 2 Kryetar Grupi Agron Shehaj dhe përfshin degët 5,7,12; Zona 3 – Kryetar Grupi Belind Këlliçi dhe përfshin degët 6,13,14,15,16; Zona 4 – Kryetare Grupi Albana Vokshi dhe përfshin deget 8, 9,10,11; Zona 5 – Kryetar Grupi Flamur Noka dhe përfshin degët, Kamëz, Paskuqan, Vorë , Kavajë dhe Rrogozhinë; Qarku Berat – Tomorr Alizoti; Qarku Elbasan – Luçiano Boçi; Qarku Korçë – Edmond Spaho; Qarku Fier – Luan Baçi; Qarku Vlorë – Bujar Leskaj; Qarku Gjirokastër – Tritan Shehu.
