Kryesia e PD, Berisha: Tani nis procesi i zgjedhjes së këshilltarëve bashkiak

Duke vlerësuar përfundimin e primareve për kandidatë për kryetar të bashkive për zgjedhjet lokale të 14 majit 2023, Kryetari i Partisë Demokratike, Sali Berisha, tha para Kryesisë PD se tani fillon procesi i zgjedhjes së këshilltarëve bashkiak ku sërish do të jetë vota e anëtarësisë që duhet të përcaktojë por me disa kushtëzime të domosdoshme, përfaqësimin e të gjitha gjinive dhe komuniteteve.

Ndërsa për qëllimin e dytë të kësaj mbledhje, analizën e situatës politike në vend, Kryetari i PD konstatoj se zhvillimet e fundit janë tipike për një regjim mafioz, që bazohet në drogën e krimin, që ka vendosur monizmin e plotë, bazuar në vjedhjen e votës së shqiptarëve dhe pasurive të tyre.

“Të nderuar anëtarë të kryesisë së PD-së, sekretarë të kësaj partie.

Kjo mbledhje është thirrur në një moment shumë të rëndësishëm, si në rrafshin elektoral edhe politik. Përfunduan me sukses përveç se në dy degë, zgjedhjet e kandidatëve për qytetarë të parë të bashkive të vendit.

Ky ishte një proces i cili zhvillohej për herë të parë me këtë proporcion, transparencë dhe pjesëmarrje. PD në përputhje me përcaktimet e statutit të rithemelimit të saj të 11 dhjetorit, bëri realitet premtimin e saj dhe sanksionimin e këtij premtimi, se pushtetarët vendorë dhe ata qendror, deputetët do të zgjidhen me votën e anëtarësisë së saj dhe simpatizantëve të saj,” tha Sali Berisha në fillim të mbledhjes së Kryesisë së PD duke saktësuar se në garë pati mbi 200 kandidatura, në tërësi veprimtarë të shquar dhe të vendosur të PD-së, por në garë morën pjesë edhe veprimtarë të shquar të shoqërisë civile dhe shqiptarët të shquar në emigracion.

“Në këtë garë, e para me këto standarde në historinë e vendit, votuan për qytetarët e parë të bashkive, rreth 55 mijë anëtarë dhe simpatizantë të PD. Kurrë ndonjëherë në këtë parti kaq vota nuk janë hedhur. Ky votim tejkaloi të paktën me 15 % të gjitha votimet e tjera.

Ky është një rast për të falënderuar të gjithë kandidatet dhe kandidatët që garuan, për të shprehur një mirënjohje të thellë të gjithë atyre që organizuan fushatën e tyre, të gjithë anëtarëve e simpatizantëve që morën pjesë në votim,” tha Berisha duke e cilësuar Partinë Demokratike si një ishull, ku drita e votës përcakton dhe ndriçon, ndryshe nga terri i shpellës së partisë së Edi Ramës.

“Komisioni i menaxhimit të zgjedhjeve do të studiojë tërësisht procesin që kaloi, me qëllimin e vetëm përmirësimin e mëtejshëm të këtij procesi. Procesi ka patur në tërësi konkurrencë të ndershme, në një rast komisioni ndërhyri për të mbajtur qëndrimet e duhura, por një rast është një dhe asgjë nuk mund të cenojë, do të thosha qytetarinë e këtij procesi, standardet me të cilat u zhvillua.

Për kuriozitetin tuaj. Në këtë garë ka pasur diferenca në vota mes kandidatëve, por ka pasur raste që kanë qenë të ngushta deri në 1 votë, e në rastin konkret, unë kam kënaqësinë të ju them ju dhe anëtarëve të PD, se në takimet e mia me ta, ata kishin të njëjtin qëndrim dhe mendim, gjë që përbën dëshmi të një shkalle përgjegjësie të vërtetë politike, civiliteti, maturiteti dhe në tërësi kjo ka qenë fryma me të cilën u mbyll gara.

Në disa bashki që mbetën për tu ripërsëritur për balotazh, ato u bënë e në ndonjë rast pati ujdi mes dy kandidatëve, të mos bëhet balotazhi dhe kjo në vlerësimin tim, nuk cenonte, përkundrazi e bënte garën më të besueshme, në kuptimin e asaj se edhe ai që vinte i dyti, e kuptonte se i pari ishte fituesi moral dhe substancial i garës. Natyrisht duke mos pasur asnjë vërejtje për ata që kërkuan balotazhin dhe e kanë bërë me besim, por edhe ata që refuzuan për të bërë një ndeshje për spektatorët, ua quaj mençuri, të dy palëve.

Kjo përbën një arritje të madhe për PD, për vendin në të cilin jashtë kësaj partie, ose në të cilin PD-ja ngjason me një ishull ku drita e votës, përcakton dhe ndriçon, dhe jashtë saj është terri i shpellës më i zi se kudo në partinë e drogës, krimit dhe mafias me në krye Edi Ramën,” tha Berisha duke paralajmëruar nisjen e procesit të zgjedhjes së këshilltarëve ku nuk duhet harruar përfaqësimi nga të gjitha gjinitë dhe komunitetet.

“Ne kemi tani procesin e zgjedhjeve të këshilltarëve, proces jashtëzakonisht i rëndësishëm i zgjedhjes së parlamentarëve vendorë.

Natyrisht ky proces nuk mund të bëhej paralelisht me kandidatët, pasi duhej të dilte kandidati që ai të ishte pjesë e këtij procesi. Në këtë proces për të cilin personalisht mendoj se do të jetë vota e anëtarësisë që duhet të përcaktojë, me disa kushtëzime. Kushtëzimet janë të domosdoshme se duhet të ketë përfaqësime të komuniteteve, përndryshe përfaqësimi përqendrohet vetëm në një pjesë të elektoratit dhe mbesin të papërfaqësua dhjetëra zona të komunitetit, elektoratit etj.

Nëse në primare nuk arritëm të kemi numrin e duhur të vajzave dhe grave për qytetare të para, për këshilltare në mënyrë absolute do të respektohet me rigorozitet të plotë, standardi statutor i kësaj partie pa asnjë ekuivok. Kjo do të thotë se ata janë të garantuar, sigurisht me garë, ndaj dhe ky votim është më i komplikuar.

Do ti lutesha komisionit se duke ruajtur proporcionet, përfaqësimin e komuniteteve edhe për këto vota e anëtarësisë të jetë përcaktuese. I kuptoj vështirësitë se duhen shumë kuti, e kontingjente, por nuk e quaj të pamundur këtë. E quaj të mundshme nëse e kemi vullnetin dhe do të bëjmë mirë të ja paraqesim edhe këtë anëtarësisë.”

Në fund, duke folur për situatën politike në fund, Sali Berisha, tha para Kryesisë së Partisë Demokratike se Edi Rama ka nisur betejën e egër kundër fjalës së lirë dhe mendimit ndryshe dhe është i vendosur të përdorë çdo pushtet për të asgjësuar opozitën e vërtetë shqiptare.

“Qëllimi i dytë i kësaj mbledhje është analiza e situatës politike në vend. Zhvillimet politike në vend janë tipike për një regjim mafioz, që bazohet në drogën e krimin, që ka vendosur monizmin e plotë, bazuar në vjedhjen e votës së shqiptarëve dhe pasurive të tyre.

Por ky regjim i Edi Ramës, nuk mjaftohet vetëm me votën, nuk kënaqet veç me votën. Ky ka nisur betejën e egër kundër mendimit ndryshe, qëndrimit opozitar, medieve të lira. Kemi të bëjmë pra me një armik të vërtetë të lirisë në kuptimin më të gjerë të saj. Ju jeni dëshmitarë se çfarë pësoi resorti turistik i presidentit të media grup Hysenbelliu.

Dufet e urrejtjes se një njeri që trashëgon të gjithë shpirtin e zi të babait xhelat, të papërmbajtura e shtynë atë që vetëm dy ditë para samitit të lidervë evropianë ti vendosë 70 kg tritol një resorti të ndërtuar me leje. Të kryejë një akt të cilin ju garantoj se as një ditakturë në prag të samitit të diktatorëve, nuk do ta kryente diktatori këtë.

Të kryejë një akt duke mos kontrolluar urrejtjen e tij patologjike kundër fjalës së lirë, i cili ju siguroj se do të ju kushtojë taksapaguesve shqiptarë, minimumi 40-50 mln euro, vetëm e vetëm se ky bir xhelati nuk kontrollonte dot urrejtjen ndaj kundërshtarit dhe motivit ndryshe.

Të njëjtat motive që shtynë babain e tij në pamje të parë intelektual, të firmosë fill pas diktatorit varjen në litar me ndërgjegje xhelati të Havzi Nelës, absolutisht të njëjta motive e shtynë Ramën të hedhë në erë para shqiptarëve, një objekt turistik që e kishte shpallur krenari të turizmit duke i krijuar një plagë të rëndë turizmit në Shqipëri, por edhe duke gjobitur çdo shqiptar me aktin e tij, se po mbaj gojën, pasi ai meriton çdo fjalë,” tha Kryetari i PD duke konstatuar se atentati nuk ishte veç ndaj meje, por ndaj opozitës.

“Edi Rama është i vendosur të përdorë çdo pushtet që ka në dorë për të zhdukur, asgjësuar jo vetëm mediat e lira, por edhe opozitën e vërtetë shqiptare.

Akti i tij me datën 6 dhjetor, ishte përpjekja e të verbrit mendor nga urrejtja se si në një moment ku zhurma mund të bëhej më e vogël sipas tij, mund ti jepte një goditje fatale opozitës shqiptare. Ka një debat normal sipas të cilit njeriu i fundit që mund të ishte i interesuar për një akt të tillë është Edi Rama. Në fakt ata që e kanë të sinqertë këtë mendim janë fatkëqinj të mashtruar nga Rama, të cilët marrin normalen për jo normale, dhe jo normalen për normale,” tha Kryetari i Partisë Demokratike, Sali Berisha, duke përfunduar:

“Ju them që nuk ka njeri më të interesuar për atë akt dhe e organizoi vetë ai. Nuk ishte një goditje, atentat, apo sido që ta quajmë kundër Sali Berishës, jo. Ai ishte një përllogaritje diabolike ndaj opozitës shqiptare, e llojit të të jatit të vet për opozitën që guxoi të thërrasë protestën ditën e samitit. Dëshmoi se opozita kishte marrë një nga vendimet më të drejta në historinë e saj, thirrjen e asaj proteste,”