Kryesia e PD, porositë e Lulzim Bashës për Protestën e 13 Prillit…

Kryetari i Partisë Demokratike, Lulzim Basha, me deputetët dhe Kryesinë e PD po finalizon përgatitjet e fundit në prag të protestës së madhe të 13 Prillit.

Me synimin për pjesëmarrje sa më të madhe në këtë protestë, Lulzim Basha në mbledhjen e sotme të Kryesisë kërkoi angazhim dhe mobilizim serioz me mesazhet tek elektorati duke ju bërë të qartë se të gjitha sondazhet tregojnë se PD aktualisht është shumicë absolute:

“Për protestën e 13 Prillit duhet një organizim kapilar për të pasur pjesëmarrje edhe më të madhe se sa në dy protestat tjera kombëtare,” tha kryetari i Partisë Demokratike duke e bërë të qartë se e gjithë situata është në favorin e tyre:

“Ne jemi de fakto shumicë. Që pas djegies së mandateve, PD ka një rritje të menjëhershme edhe mes të pavendosurve. Jemi shumicë absolute në çdo sondazh të pavarur vendas dhe të huaj,” tha Basha duke shtuar se elektoratit duhet ti bëhet sërish me dije në çdo takim se kërkesa e Partisë Demokratike mbetet e pandryshuar:

“Pjesëmarrja e lartë në protestë ka një rëndësi të jashtëzakonshme. Kërkesa jonë mbetet e pandryshueshme: Largimi i Edi Ramës dhe qeveria tranzitore.”