Kryetar i Autoritetit të Konkurrencës, PS propozon Denar Bibën, opozita kundër: Ka shantazhuar…
Për shërbimin që i bëri në Komisionin Qendror të Zgjedhjeve, sot Partia Socialiste e shpërblen Denar Bibën duke e propozuar për kryetar të Autoritetit të Konkurrencës. Opozita duke e kundërshtuar kandidaturën rikujtoi propozuesin në Komisionin e Ekonomisë se Denar Biba është akuzuar se ka shantazhuar gjyqtarin shqiptar në Strasburg Ledio Bianku për të ndërhyrë në një çështje e pronave që po gjykohen në Gjykatën e të Drejtave të Njeriut.
Por kjo nuk i bëri përshtypje Kryetarit të Komisionit të Ekonomisë, Eduard Shalsi, i cili vazhdoi axhendën e Edi Ramës duke shtuar se Denar Biba i përmbush të gjitha kriteret ligjore për të mbajtur këtë funksion.
“Kuvendi i Shqipërisë, duke vlerësuar rëndësinë e Komisionit të Konkurrencës do shqyrtojë kandidaturën e zotit Denar Biba për në seancë parlamentare. Denar Biba është zgjedhur anëtar i komisionit me vendimin 29 viti 2021, dhe ka përmbushur kërkesat ligjore. Sot komisioni do të shqyrtojë dhe do propozojë kandidaturën e zotit Denar Biba,” tha Eduard Shalsi ndërsa u kundërshtua nga kryetari i Grupit Parlamentar të PD, Alfred Rushaj:
“Nuk është korrekte që të marrim në shqyrtim një kandaturë që nuk është fare në këtë mbledhje. Duam që zotëria të vijë, dhe të na paraqisi platformën e vetë dhe për të treguar vizionin e tij për të drejtuar këtë institucion. Institucioni i konkurrencës është shumë e rëndësishme. Ne absolutisht nuk gjykojmë që zotëria do të ketë besimin e një pjese të mirë, jo vetëm të opozitës por edhe shoqërisë. Mos të harrojmë që është, jo vetëm me afërsinë politike, por të mos harrojmë që është personi që ka mbajtur një pozicion të lartë shtetëror që është akuzuar nga një anëtar i Gjykatës së Strazburgut për ndërhyrje në një çështje në Gjykatën Evropiane të të Drejtave të Njeriut. Nuk do ishte e udhës për ta çuar. Në këto institucione, ka qenë praktikë që të ketë dhe opozita. Kur keni qenë ju në opozitë, keni pasur një post. Ka uzurpuar pozicionin e anëtarit që e ka mbajtur opozita. Po prishni një praktikë të kuvendit.”
Por Kryetari i Komisionit Eduard Shalsi e kishte përgjigjen në maje të gjuhës duke shtuar se këto pretendime nuk qëndrojnë, dhe ndonëse janë publikuar përgjimet Shalsi tha se nuk ka asnjë fakt që të vërtetojë këtë akuzë.
“Është akuzuar tha Rushaj. Nuk ka asnjë dokument që anëtari i Gjykatës së Strasburgut ta ketë akuzuar. Nëse do të kishte pasur shantazh ose vepër penale, gjyqtari do e kishte referuar në gjykatat e vendit. Nuk ka pasur asnjë referim nga zotëria. Nga ana tjetër, në këtë Autoritet Konkurrence kemi pasur një anëtar që sot është deputet dhe hoqi dorë nga posti i tij për të marrë postin si deputet. Nuk besoj se të merresh me politikë, dhe të mos jesh profesionist. Në referencën e një libri që ka botuar, ka 3 personalitete në opinionin tim, është një zonjë që ka dhënë një koment mbi librin, Aurel Anastasi, Sokol Sadushi dhe Xhezair Zaganjori.”
