Kryetar i Bashkisë si Qazim Mulleti!
nga Agim Popoci
Me zyrtarizmin e kandidaturave të Partisë Demokratike për primaret e zgjedhjeve lokale të vitit 2023, me urdhër të donatorëve mediat hapën dyert më shumë për denigrimin e atyre figurave që nuk i mbështesin dhe janë rival të mundshëm të Erion Velisë për Kryetarin e Bashkisë Tiranë!
Në këtë vorbull mediatike ku kërkohej se s’bënë përgjigja nëse ky rival i Lali Erit duhet të jetë politik ose jo, ishte e vështirë të bëhej diferenca në mes tre kandidatëve më serioz nga 7 sa janë gjithsej në garë, Belind Këlliçi, Gerti Bogdani dhe Ilir Alimehmeti, që do të drejtojnë bashkinë me një politikë ndryshe për kryeqytetin, ndryshe nga paraardhësit!
Duke qenë se që të tre janë tirons dhe historia politike e të tre kandidatëve vjen nga e djathta shqiptare, kjo e vështirësoi edhe më shumë lakmuesin e identifikimit përmes të cilit do të përcaktohej edhe votuesi shqiptarë, aq shumë i irrituar me shpërdorimin komunist që i bëri dhe i bënë Lali Eri, drejtimit të Tiranës!
Pika që hapi sytë demokratë, jo vetëm për të bërë qartësisht dallimin në mes të kandidatëve, ishte pyetja në njërën nga mediat që iu bë këtyre kandidatëve në garë, për modelin që do ndjekin në drejtimin e kryeqytetit shqiptar, si Sali Kelmendi, Albert Brojka apo Lulzim Basha!
Për Belind Këlliçin mund të konsiderohej pyetje e vështirë shpallja e një emri të oligarkut, meqenëse shihej qartë se nuk është akredituar nga partia për një gjë të tillë, por, një politikan i këtij kalibri, ku i qëndroi pranë Lulzim Bashës në Bashkinë e Tiranës dhe më pas Sali Berishës në Foltore, me “sakrificën” mbi supe të dorëzimit të mandatit të deputetit, rolin aktiv në denoncimin e inceneratorëve dhe sforcimin e orëve të fundit në protagonizmin e Luftës për Teatrin, gjithçka mund të pritej por jo se preferonte të jetë kryetar si Lulzim Basha!
Ilir Alimehmetin tironsit kishin rastin ta shohin gjatë pandemisë me këshilla dhe vendime të prera për “armikun e padukshëm të Edi Ramës” dhe fituan me arsye një simpati dhe besim për njeriun të cilit nuk kishin arsye të mos i dorëzonin shëndetin në duar edhe në këtë situatë krize. Por, Dr.Alimehmeti nuk u pa i prerë si në rastin e pandemisë, dhe, ajo çka tha për modelin, nuk ishte asgjë! Tregoi për vështirësitë e administrimit të kryeqytetit pas periudhës së diktaturës dhe kontributin e kryebashkiakëve që vinin nga PD. Kaq!
Ndryshe nga rivalët e tij, njeriu që i kishte qëndruar pranë si Sali Berishës dhe Lulzim Bashës, dhe me shumë sukses kishte drejtuar Marrëdhëniet me Jashtë, në veçanti atë me PPE, Gerti Bogdani, dha një përgjigje të prerë e cila përveç se bënte dallimin, dëshmonte se 50 vjet të diktaturës komuniste nuk mund të shlyenin punën e një njeriu që drejtoi qytetin më të rëndësishëm në vend, sado që u përqeshë dhe përqeshet nga këta që drejtojnë Tiranën dhe gjithë Shqipërinë, pra, Qazim Mulleti!
Nuk mund të vihet në dyshim që rivalët e Gert Bogdanit nuk respektojnë punët e mëdha që Qazim Mulleti bëri në Tiranë, por, ky është modeli i vetëm real në garën elektorale me Erion Velinë që do ta bëjë të turpërohet si atë ashtu dhe mentorin e tij Edi Rama, që shkatërruan për 11 vjet Tiranën!
Pavarësisht satirës pa kripë me “Prefektin”, Qazim Mulleti për vetëm 2 vjet bëri atë që Edi Rama dhe Erion Velia nuk i bënë dot as për 19 vjet, duke përjashtuar këtu nivelin intelektual të cilin as familjet Veliaj-Rama nuk mund ti mbërrijnë sa t’është jeta!
Planet që kishte nisur Mbreti Zog i vazhdoi Qazim Mulleti me godinën e korpusit universitar, kolonadat apo sot Muzeu i Arkeologjisë, Akademia e Arteve, ku në atë kohë u vendos edhe opera, Kryeministria dhe hotel “Dajti”.
Ndërkohë ajo që komplekson edhe sot komunistët me drejtimin e Tiranës nga Qazim Mulleti, që nuk ështe edhe arsye e vetme pse duhet përqafuar ky model, është çelja e çezmave, ndërtimi i banjove publike dhe largimi i varrezave nga qendra e qytetit.
Shumë tirons ndërsa shëtisin sot tek Kodrat e Liqenit sapo shuajnë etjen me çezmat e vendosura, gjithmonë kujtojnë kohën e Qazim Mulletit; Ndërsa kur Lali Eri dhe Edi Rama luftojnë temperaturat ekstreme pranë gungës së shtrirë para Skënderbeut, me shishe uji “falas”, të gjithë shqiptarët irritohen pse komunistët nuk e gjetën as për 80 vjet një njeri të mençur si Kryetari i Bashkisë Tiranë, Qazim Mulleti!
Banjot publike, për ti thënë premtim elektoral është turp! Por, nuk ka qytetarë në Tiranë që nuk e ka kujtuar Qazim Mulletin kur u luajt finalja e UEFA Conference League në mes të Romës dhe Feyenoordit!
Urina që derdhën në pedonalen e Tiranës, tifozët e këtyre skuadrave nga dy qytete të mëdha evropiane me kulturë dhe traditë, ishin kritika më e mirë si për skenarin e “Prefektit” të Besim Levonjës, regjinë e Pirro Manit, përshtatjes në film nga Vera Grabocka, dhe të mos harrojmë, drejtimin e Tiranës nga Edi Rama dhe Erion Veliaj!
Kur jemi tek kjo dyshe kriminale e drejtimit të kryeqytetit, nuk duhet harruar dhe varrezat! Pas stresit të madh të tironsve dhe jo vetëm, me “shëndetësinë falas” që nuk e shijuan kurrë, ata përballen edhe me të vdekurit e të afërme të tyre po nga kjo shëndetësi!
Deri sa Edi Rama nuk la varreza pa rrugica duke i hapur të gjitha në mungesë të shpronësimeve të tokave për varreza, dhe shegerti i tij Erion Veliaj që bënë lajm sa herë shpronëson toka për varre, Qazim Mulleti veproi ndryshe, që është dhe arsyeja pse duhet të jetë model edhe sot.
Në kohën e drejtimit të Tiranës nga Qazim Mulletit, largimi i varrezave nga qendra e qytetit ishte shkencë, dhe ai e përballoi lehtësisht duke nis nga varrezat e familjes së vetë. Të shkruash sot për këtë ngjarje është e lehtë nëse në kokë e ke “Prefektin” e Besim Levonjës, Pirro Manit dhe Vera Grabockës, por, jo edhe kur mendon si Gerti Bogdani që projekton të parin e kryeqytetit me një mendësi të Qazim Mulletit.
Në fund, Tirana me miliona turistë sot mund të jetë e vërtetë, por kryeqytetit shqiptar nuk i mungon krenaria e Edi Ramës dhe Erion Veliajt me këto shifra, por, një model drejtimi si e poliglotit Qazim Mulleti i cili zotëronte gjuhën turke, arabe, gjermane, frënge, italiane, greke dhe serbe.
