Kryetar i ri i PDK, Memli Krasniqi
Me 469 vota për dhe 7 kundër Konventa zgjedhore e PDK zgjodhi për Kryetar të ri të Partisë Demokratike të Kosovës, PDK, Memli Krasniqin. Sapo mori besimin e delegatëve të PDK-së, ai u zotua se do të vazhdoj rrugëtimin e përbashkët në hapat e Hashim Thaçit e Kadri Veselit, themeluesve të partisë që aktualisht janë në Hagë.
“Ju sot sapo më m’veshët me besimin që ua kërkova për të vazhduar rrugëtimin e përbashkët e për të çuar tutje rrugën në hapat e dy liderëve tonë Hashim Thaçit dhe Kadri Veselit, por edhe të Enver Hoxhaj… Përtej vetëm një mandati kërkova besimin tuaj dhe do t’ua shpërblejë me punë e përkushtim të pandalshëm, me bashkëpunim me secilin anëtar të PDK-së, pro edhe me gjithë ata qytetarë të vendit tonë që duan t’i bashkohen PDK-së për një të ardhme më të mirë por edhe për shtetin tonë,” tha Krasniqi e meqë e njeh mirë shpirtin e partisë dhe vullnetin që buron nga secili anëtar i PDK-së, kështu tha ai do t’ia dalin në vazhdim e rrugëtimit.
Ndonëse ishte kandidati i vetëm për kryetar të PDK-së, Memli Krasniqi, prezantoi platformën e cila synon ta kthejë në vendin e parë dhe që të qeverisë me vendin.
“Ne sot jemi në opozitë. Kanë qenë edhe gabimet tona që i kanë kontribuuar kësaj situate. Ndoshta s’kemi mundur ta lexojmë krejt saktë disponimin e votuesve, prandaj edhe në dy palë zgjedhjet e fundit nuk kemi marrë mjaftueshëm mbështetjen e tyre. Reflektimi është i domosdoshëm. Nuk mund të vazhdojmë edhe më tutje njëjtë. Në këtë pikë, besoj se pajtohemi të gjithë. Kështu si jemi sot, nuk mjafton për t’u rikthyer. Por, ne qëllimin e kemi për t’u rikthyer,” tha Memli Krasniqi duke shtuar se beteja kryesore e PDK-së është në Palramentin e Kosovës ndërsa ftoi deputetët e këtij subjekti politik që të angazhohen sa më shumë në këtë institucion.
Por, kush është Memli Krasniqi?
Memli Krasniqi u lind në Mitrovicë më 25 janar 1980 ku ka kryer shkollimin fillor në shkollën fillore “Hasan Prishtina” dhe atë të mesëm në Gjimnazin “Xhevdet Doda”. Ka përfunduar studimet për Shkenca Politike dhe Administratë Publike në Fakultetin Filozofik të Universitetit të Prishtinës, ndërsa ka mbaruar magjistraturën në Marrëdhënie Ndërkombëtare në Shkollën Londineze për Ekonomi dhe Shkenca Politike, LSE.
Në vitet 1999 – 2000 ka punuar si gazetar për agjencinë amerikane të lajmeve Associated Press, ndërsa në vitin 2002 ka qenë Drejtor për Marrëdhënie me Publikun në Qendrën e Telemjekësisë së Kosovës.
Për shumë vite është marrë me muzikë dhe ka punuar në projekte të ndryshme muzikore, kryesisht si tekst-shkrues dhe si anëtar i grupit “Ritmi i Rrugës”.
Nga viti 2004 është angazhuar aktivisht në Partinë Demokratike të Kosovës (PDK),
Në tetor të vitit 2006 është zgjedhur Kryetar i Rinisë Demokratike të Kosovës.
Nga ky pozicion, ai ka qenë edhe anëtar i Kryesisë së PDK-së. Në shkurt të vitit 2013, Krasniqi është zgjedhur Nënkryetar i PDK-së për Çështje Organizative dhe të Rinisë.
Në zgjedhjet parlamentare të vitit 2007, Memli Krasniqi është zgjedhur për herë të parë deputet i Kuvendit të Kosovës.
Suksesi më i madh i tij në politikë është të qenit Ministër i Kulturës, Rinisë dhe Sport, e po ashtu edhe Ministër i Bujqësisë.
Ndërsa në zgjedhjet e fundit ai u rizgjodh për herë të gjashtë deputet i Kuvendit të Kosovës dhe është shef i Grupit Parlamentar të PDK-së.
Është ndër dhjetë personat më të votuar në PDK.
Memli Krasniqi jeton në Prishtinë, me bashkëshorten Melizën dhe fëmijët Borën, Malin dhe Verën.
