Kryetarët e 13 Komisioneve të Jashtme BE-së: Të hiqen masat ndaj Kosovës dhe të hetohet sulmi në Banjskë

Kryetarët e Komisioneve të Jashtme Parlamentare të 13 shteteve i janë drejtuar përmes një Letre Përfaqësuesit të Lartë për Politikë të Jashtme të Bashkimit Evropian, Josep Borrell dhe ndërmjetësit të dialogut Kosovë-Serbi, Miroslav Lajçak, duke i kërkuar ti jepen fund të gjitha masave negative kundër Kosovës dhe të bëhet një hetim i plotë për sulmin në Banjska dhe për të publikuar rezultatet.

Letra, të cilën e bëri publike përmes rrjetit social X, Kryesuesja e Komitetit për Punë të Jashtme të Parlamentit të Mbretërisë së Bashkuar, Alicia Kearns, flet në detaje sulmet e njëpasnjëshme, si agresionin serb më 24 shtator, rrëmbimin e policëve, si dhe kërkon të dihet roli i Serbisë në sulmin e shtatorit, etj. Gjithashtu, thuhet se agresioni i 24 shtatorit mund të kishte eskaluar po të mos ishte profesionalizmi i Policisë së Kosovës.

Në prag të Samitit të BE-së dhe Ballkanit Perëndimor i bëhet thirrje po ashtu BE-së që t’i largojë masat ndëshkuese ndaj Kosovës.

Ndryshe, Letra është nënshkruar nga Kryetarët e Komisioneve të Jashtme Parlamentare të Britanisë së Madhe, Gjermanisë, Çekisë, Irlandës, Lituanisë, Estonisë, Letonisë, Belgjikës, Kroacisë, Danimarkës, Italisë dhe Bullgarisë.

Letra e plotë:

Në dritën e Samitit BE-Ballkani Perëndimor, ne po ju shkruajmë për të kërkuar që të gjitha masat ndëshkuese kundër Kosovës të anulohen dhe të rifillojë bashkëpunimi i plotë me Qeverinë e Kosovës.

Bojkoti i zgjedhjeve komunale të nxitura nga Lista Serbe më 23 prill, sulmi ndaj KFOR-it më 29 maj, ndalimi arbitrar i policëve kosovarë nga autoritetet serbe më 14 qershor, destabilizojnë Kosovën.

Është jetike që komuniteti ndërkombëtar të refuzojë irredentizmin dhe agresionin dhe të riafirmojë mbështetjen për pavarësinë dhe sovranitetin e Kosovës.

Sulmi nga tridhjetë militantë të armatosur rëndë, të udhëhequr nga nënpresidenti i listës serbe, Milan Radoiçiq, më 24 shtator shënoi përshkallëzim.

Situata mund të kishte kaluar lehtësisht në një përshkallëzim më të gjerë, po të mos ishte profesionalizmi dhe guximi i Policisë së Kosovës, njëri prej të cilëve u vra tragjikisht.

Sasia dhe lloji i armëve të sekuestruara pas sulmit ngre pyetje serioze mbi rolin që mund të ketë pasur shteti serb në mbështetjen e operacionit.

Ne i bëjmë thirrje BE-së, SHBA-së dhe Britanisë së Madhe që të ndërmarrin një hetim të plotë mbi sulmin në Banjskë dhe të angazhohen për publikimin e rezultateve.