Kryetari i KKSH: Stërvitjet ushtarake të Serbisë në Bujanoc, kërcënim për shqiptarët

Kryetari i Këshillit Kombëtar Shqiptar, KKSH, Enkel Rexhepi, duke reaguar ndaj zhvillimit të stërvitjeve ushtarake të Serbisë në territorin e Komunës së Bujanocit, pranë kufirit me Kosovën, u shpreh se këto veprime përbëjnë një provokim të radhës ndaj popullatës shqiptare.

“Demonstrimi i forcës me helikopterë dhe parashutistë në zona të banuara përbën kërcënim të drejtpërdrejtë për qetësinë dhe sigurinë e qytetarëve shqiptarë,” u shpreh Enkel Rexhepi përmes rrjetit social Facebook duke i cilësuar këto veprime si të papranueshme dhe të rrezikshme, ndërsa paralajmëron se ato rikthejnë një klimë frike dhe pasigurie në rajon duke përfunduar:

“Prania e bazave dhe zhvillimi i stërvitjeve ushtarake krijojnë një atmosferë presioni dhe frikësimi mbi popullatën shqiptare, duke ndikuar drejtpërdrejt në shtimin e pasigurisë dhe nxitjen e shpërnguljes së shqiptarëve nga këto troje.”