Kryetari i Komisionit të Ligjeve gënjen, Voltana Ademi: Nuk jam ftuar!

Pasi Kryetari i Komisionit të Ligjeve, Ulsi Manja, deklaroi se kryetarja e Shoqatës së Bashkive të Shqipërisë, Voltana Ademi ishte ftuar në Komision në kuadër të diskutimeve mbi projektbuxhetin e pushtetit vendor 2020, por për shkak të angazhimeve nuk merr pjese në Komision, ka reaguar Ademi duke theksuar se kemi të bëjmë thjeshtë me gënjeshtrën e radhës dhe se ajo nuk ishte ftuar në Komisionin e Ligjeve.

“E vërteta është një dhe e vetme: Voltana Ademi nuk është ftuar në mbledhjen e Komisionit të Ligjeve! Nuk ka patur asnjë komunikim, të asnjë lloji në formën e ftesës për të marrë pjesë në mbledhje as si kryetare e Bashkisë Shkodër dhe as si kryetare e Shoqatës së Bashkive të Shqipërisë,” thekson Voltana Ademi në reagimin e saj përmes rrjetit social Facebook duke shtuar se pavarësisht se nuk ka pasur asnjë ftesë për Kryetaren, Shoqata e Bashkive të Shqipërisë ka dërguar shqetësimet dhe objeksionet e saj lidhur me projektbuxhetin.

“Deklaratat e z. Manja janë thjesht gënjeshtra e radhës, demagogji për të dizinformuar mediat dhe publikun. Nuk kanë asnjë lidhje me të vërtetën,” thekson Kryetarja e Bashkisë Shkodër dhe Kryetarja e Shoqatës së Bashkive të Shqipërisë, Voltana Ademi, në reagimin e saj duke përfunduar: 

“Por, personalisht nuk çuditem aspak, sepse kjo mazhorancë edhe vetë Ulsiu e kanë të provuar tashmë se qëllimin e vetëm kanë gllabërimin e të gjitha pushteteve, institucioneve, duke përdorur edhe dizinformimin   e publikut dhe mediave.”

Ndryshe, Kryetari i Komisionit të Ligjeve, Ulsi Manja, ndonëse ishte në transmetim drejtë për drejtë televiziv nuk zhgënjeu shefin rilindas dhe gënjeu edhe publikisht duke deklaruar:   “I kemi bërë ftesë për të qenë në seancën dëgjimore edhe shoqatës se bashkive që e drejton kryetarja në detyre e bashkisë Shkodër Voltana Ademi. Në komunikim me Ademin, ajo ka njoftuat se për shkak të angazhimeve nuk merr pjese në komision, por ka dërguar një material me shkrim.”