Kryetari i ri i PD nga Brain Gain
nga Agim Popoci
Falangat mediatike të Edi Ramës janë futur sërish në shtëpinë e Partisë Demokratike për të caktuar kohën se kur duhet të largohet kryetari i saj Sali Berisha, dhe për të “ruajtur” dinjitetin e Statutit të PD!
Ky zell i këtij llumi komunist që tashmë ka mbi spaleta edhe investitorin strategjik ndonëse drejtojnë mediat më të pista në Evropë, nuk ndalon te Kryetari. Si polumbar në gjak që janë, vazhdojnë me Sekretarin e Përgjithshëm dhe anatemimin e gjithë anëtarëve të Kryesisë!
Sikur sulmet të bëheshin në emër të pushtetit të katërt duke prekur formalisht dhe krimet e Partisë Socialiste për 12 vjet qeverisje, ndoshta dhe kronikat e tyre pafund do të kishin kuptim. Por, deliri që ka prekur Fugën dhe shefin e tij Rama me mediat që kanë vendosur në pushtetin e parë, kanë krijuar një mirazh të pashpresë në politikë, sikur idiotizmi i dalë nga goja e Edi Ramës se ai do të largohet kur të donë vetë, është realitet.
Krijimin e kësaj situate mund ta ketë ndihmuar edhe asfiksimi i opozitës pas zgjedhjeve të 11 Majit, por asgjë nuk është e pashpresë dhe aq më pak reale.
Pas katër mrekullive politike të Sali Berishës, krijimit të PD, rikthimit në politik të PD pas Revolucionit Komunist të vitit 1997, fitores në vitin 2005 me të gjithë aleatët perëndimor kundër, dhe, Rithemelimit të PD pas gjenocidit politiko-juridik të Edi Ramës, si domosdoshmëri e kohës për mbijetesën e PD shfaqet detyra jetike për mrekullinë e pestë të Sali Berishës, reformën e thellë të partisë më të madhe opozitare dhe një Kryetar ndryshe i PD!
Me Brain Gain…
Nën presionin e madh elektoral pas zgjedhjeve të 11 Majit, të ndihmuar nga propaganda e egër mediatike e Edi Ramës, detyrë urgjente e Sali Berishës është reforma e thellë e Partisë Demokratike jo vetëm për të larguar Edi Ramën, por, edhe për të ecur me hapin e kohës duke pasur parasysh gabimet që u bënë nga viti 2005, kur nuk u analizua fitorja, dhe, viti 2013, kur në krye të partisë u vendos një injorant politik që për idhull kishte një bashkëpunëtor të Sigurimit të Shtetit!
Brain Gain si një organizëm që lindi me ide të qartë që mund të shërbente për rifreskimin e radhëve të partisë, humbi kuptimin shumë shpejtë sapo projektet dhe idetë e saj të hedhura në letër u bënë publike, dhe rrjedhimisht nuk u jetësuan nga asnjë organ i Partisë Demokratike!
Kjo nuk nënkupton se idetë e Brain Gain ishin fantastike në tërësi dhe nuk kishte vend për kritikë, sepse edhe ato pak ide gjeniale që përmbanin ato që ishin hedhur në letër dhe ishin bërë publike, mund ti shërbenin vetëm hartimit të një projekti për një ose dy lëndë në Kolegj ose Universitet, dhe jo një partie me të gjitha karakteristikat shqiptare dhe ballkanike që ka PD; Dhe, pavarësisht se pjesëtarët e Brain Gain me aftësitë e tyre mund të shërbenin si profesor në cilindo Kolegj dhe Universitet, pa asnjë dyshim!
Si i tillë, Brain Gain kurrë nuk u inkorporua madje nuk shërbeu as si Këshilltar i drejtuesve të partisë dhe sjellja e liderëve lokal dhe kandidatëve për deputet nuk e amniston as vetë Brain Gain.
Është rasti i Librit të Punëve të Mira që u ideua si Udhërrëfyes për demokratët dhe qytetarët shqiptarë, dhe përfundoi si një Projekt që nuk i shërbeu asnjë demokrati dhe asnjë qytetari shqiptar, ku përjashtim bënë vetëm një demokrat dhe qytetarë shqiptar, Sali Berisha!
Jo se Brain Gain e thotë se vjen si një gur që i mungon sot shtëpisë së përbashkët, PD, dhe trajton vetëm çështje të përzgjedhura të cilat autorët gjykojnë më të spikatura, por pikërisht se është i tillë, pas angazhimit të faktorëve politik në 11 Maj, Brain Gain mbetet një shkëndijë që mund të ndezë zjarrin demokrat i cili është duke u shuar!
Këtu është jetike dhe ndërhyrja e liderit Sali Berisha, i cili ndonëse nuk arriti të prodhoj një pasardhës nga radhët e FRPD, duhet të propozoj një reformë të thellë të organizimit partiak duke përfshirë dhe Forumin Rinor, me dhënien e vendit të liderit, Brain Gainit!
Që PD të jetë ndryshe, që pema e saj të jep fryte me metoda të reja nga sa janë përdorur deri më sot, duke zhdukur me urgjencë Drejtuesit Politik, si spaleta më e shpifur që mund ti jepte Kryetari me Kryesinë një personi që bënë Komandantin në bazën e partisë, Sali Berisha duhet ti jap trurit “gain” një hapësirë serioze për reformimin e partisë.
Pse jo duke i garantuar edhe vendin e Kryetarit të ri, një pjesëtari të Barin Gain!
Dhe, pse jo drejtuesit të Brain Gain, Andi Mustafaj, i cili dëshmoi aftësi artikulimi politik të qartë, besim tek pjesëtarët e këtij organizmi, dhe ajo çka është më e rëndësishmja, vullnet të madh jo vetëm politik për një parti ndryshe demokratike, duke pasur parasysh dhe faktin se PD është në opozitë!
Truri i PD-së
Me zgjedhjen e Kryetarit të ri të PD nuk do të thotë se lideri historik Sali Berisha duhet të largohet nga selia e PD dhe të rinjtë të vazhdojnë punën!
Kur u shpik rrota, si shpikja më e madhe në historinë e njerëzimit, shpikjet nuk morën fund aty por rrota u fut në çdo pore të jetës, nga transporti deri tek AI sot, që pa rrotën nuk mund të imagjinohen komponentët kryesor të serverit, që është dhe truri i Inteligjencës Artificiale.
Pa e lodhur trurin me Senate dhe Këshilla të Urtëve, duke pasur parasysh se PD është në opozitë, pjesëtarëve të Brain Gain që do të fillojnë me reformimin e Partisë Demokratike, do t’ju duhet një filtër që ka mbi supe përvojën që mund të jetë një organ partiak si “Truri i PD”!
Ky “Brain of Democratic Party” që do të përbëhej nga senatorët e Partisë Demokratike me në krye Sali Berishën, do të pengonin që në start përsëritjen e gabimit të Lulzim Bashës për të kopjuar Edi Ramën në politikbërje deri në menaxhimin e administratës së partisë.
Basha ashtu sikur se Rama, sapo u bë kryetar injoroi strukturat e partisë dhe gjithë Bashkinë Tiranës e zhvendosi në selinë e Partisë Demokratike ku u bë Kryetar, duke mos përjashtuar dhe pastrueset bashkiake! Dhe, duke mos njohur funksionimin e partisë, çdo demokrat e shndërroi në një qytetarë që shkon në Bashkinë PD për hall, dhe duke mos njohur të djathtët, çdo patriot e largoi nga kjo shtëpi e madhe që u krijua me shumë sakrificë!
Dhe, ky “Tru” do të kuronte gabimet nga i gjithë rrugëtimi i Partisë Demokratike nga Rithemelimi deri më sot!
Kryetarit të ri, Ani Mustafajt, përvoja e Sali Berishës si frankofon shumë i dashur në botën anglosanksone, do ti shërbente që në masë të madhe ta zbuste atë krenari frankofone që është e injektuar tek çdo student parisien dhe është pengesë e frikshme në marrëdhënie me Washingtonin, Berlinin dhe Brukselin, si dhe tek lidershipi i ish-perandorive që sot janë pjesë e botës euroatlantike!
Si ish-kryetar i PD, Sali Berisha nuk ka se pse i shërben Partisë Demokratike siç e mendojnë Albana Vokshi dhe Tritan Shehu, dhe, as të mendohet që pa Berishën PD do të shuhet, por si lider priti dy President të SHBA kur PD ishte në pushtet, anëtarësoi Shqipërinë në NATO, liberalizoi vizat, përmbylli Marrëveshjen e Stabilizim Asocimit, dhe, ndërtoi Rrugën e Kombit, Sali Berisha me “Trurin e PD”, do të jetë dhe hinka e fundit prej nga Vendimet e PD do të dalin në jetë!
Thjeshtë, Vendimet e këtij “Truri” duhet të jenë serioze dhe me arsyetime logjike për bazën e PD, qytetarët që e gjejnë veten në këtë parti, dhe politikën shqiptare që e ka humbur rrugën në oborrin e saj, të cilin vazhdon ta kontrolloj Beogradi!
Në fund, por jo pak e rëndësishme, lidershipi i Partisë Demokratike nuk duhet të kompleksohet nga propaganda e Edi Ramës dhe e antiberishistëve që do të aktivizohen në çast, se me “Trurin e PD” Sali Berisha do që të kontrolloj partinë! Sepse, me ose pa këtë “Tru”, po kjo akuzë do të gumëzhijë në altoparlantët e Edi Ramës deri sa në jetë do të jetë kjo parti kriminale, pra, Sigurimi i Shtetit!
