KS OKB diskuton vendimin e SHBA për Lartësitë Golan
Këshilli i Sigurimit i Kombeve të Bashkuara me kërkesën e Sirisë sot diskuton për vendimin e presidentit të SHBA, Donald Trump për të njohur sovranitetin e Izraelit në Lartësitë Golan, raporton RFE.
Izraeli ka pushtuar Lartësitë Golan nga Siria më 1967 në një luftë në Lindje të Mesme dhe ka aneksuar këtë zonë më 1981, ndonëse Këshilli i Sigurimit i OKB-së e pati cilësuar këtë hap “pa ndonjë efekt ligjor ndërkombëtar”.
Në një letër drejtuar 15 anëtarëve të Këshillit të Sigurimit, Siria e ka përshkruar vendimin e Shteteve të Bashkuara si “shkelje flagrante” të rezolutës së këtij Këshilli.
Presidenti Trump, i shoqëruar nga kryeministri izraelit, Benjamin Netanyahu në Washington, ka nënshkruar të hënën një dokument, përmes së cilit i ka njohur Izraelit sovranitetin në Lartësitë Golan.
Anëtarët evropianë në këtë Këshill, Franca, Britania, Gjermania, Belgjika dhe Polonia, kanë thënë se nuk njohin sovranitetin e Izraelit në këtë territor dhe kanë ngritur shqetësime rreth pasojave tjera që mund të sjellë njohja e këtij aneksimi ilegal.
Arabia Saudite, Emiratet e Bashkuara Arabe, Bahreini, Katari dhe Kuvajti, gjithashtu kanë kritikuar vendimin amerikan, duke thënë se territori është pushtuar në tokën arabe.
