Ku është Ilir Meta?!

Nuk ka shqiptarë normal në këtë botë që nuk ndjenë kënaqësi kur sheh Presidentin e Shqipërisë në Guci dhe Vuthaj, por jo edhe Iliri Metën. Arsyet janë të shumta, por vetë ai i vulosi këto ditë të nxehta vere, kur broçkullat e Hashim Thaçit krijuan klimë lufte në Kosovë, Luginë të Preshevës dhe jo vetëm.

Lëvizjet taktike, siç i trajtoi kryeministri i vetmuar i Kosovës, Ramush Haradinaj, broçkullat e Presidentit të Kosovës, mund të kishin edhe tjetër epilog, por heshtja e Tiranës zyrtare nga njëra anë dhe aktiviteti ekstrem në anën tjetër i Beogradit zyrtar, lënë shumë pikëpyetje edhe sot kur ende nuk ka skaduar ultimatumi i serbëve të Kosovës për shpalljen e autonomisë në veri, 5 gusht 2018.

Shqetësimi bëhet edhe më i madh kur heshtjen e Iliri Metës e shoqërojnë edhe mediat shqiptare, që shumicën i ka nën kotroll, dhe në ditë të zakonshme raportojnë edhe ku e hëngri byrekun Presidenti i Republikës.

Tensionet e pritura

Ka ditë që flitet për Draftin e Statutit të Asociacionit të komunave me shumicë serbe, i cili duhej të dorëzohej në Bruskel më 4 gusht dhe që nuk është gati; Dhe ka muaj të tërë që serbët e Kosovës kanë kërcënuar se në rast se ky Draft nuk është gati ata do ta shpallin autonominë në veri të Kosovës.

Pavarësisht se shqiptarët e njohin mirë politikën shoviniste serbe e cila ka një shekull që nuk ndryshon, pavarësisht se kanë edhe formulën e shtetndërtimit nën presionin serb dhe ndërkombëtar nga Kroacia e Tuxhmanit, liderët shqiptarë të papërvojë ose për qëllime tjera, sërish krijuan tensione të panevojshme ndërshqiptare.

Sot ende nuk dihet arsyeja se pse Presidenti i Kosovës, Hashim Thaçi hodhi idenë e shkëmbimit të territoreve në momentin kur priteshin tensione në veri, kur një gjë e tillë, jo vetëm që nuk përkon me gjeopolitikën dhe gjeostrategjinë qoftë edhe të një injoranti, por “shkëmbimi” si zgjidhje etnike në Evropën Juglindore nuk u përqafua as në rastin e Kroacisë dhe as atë të Bosnje Hercegovinës, kur në tavolinë nuk ishte asgjë më shumë se armëpushimi dhe paqja!

Në fillimvitet ’90-të Thaçi edhe mund të mos e dinte se cili mund të jetë rezultati i shkëmbimit të territoreve, pa u futur në historinë se kemi të bëjmë me një territor shqiptarë që në fakt është Kosova Lindore, ajo që i ndodhi Franjo Tuxhmanit me serbët dhe ndërkombëtarët, duhet të jetë recetë e shtetndërtimit. Nëse dikujt i shkon në mendje se Hashim Thaçi e do më shumë Kosovën Lindore se Franjo Tuxhmani që e donte Hercegovinën, atëherë lirshëm le të shkoj te psikologu. Por, Tuxhmani e kuptoi se loja me presione me Millosheviçin, Kishën Ortodokse të Serbisë dhe Akademinë e Shkencave është betejë e humbur, dhe bëri atë që bëri.

Dhe çfarë bënë Hashim Thaçi, njeriu që kurrë nuk e ka përmend komandantin legjendar të UÇPMB-së, Ridvan Qazimi i njohur si Komandant Lleshi edhe pse e ka tradhtuar me betimin e tij të UÇK-së, kurrë nuk është kujtuar për shqiptarët që jetojnë atje edhe kur librat konfiskoheshin nga dogana serbe, dhe zgjohet një ditë të mirë fillimgushti të vitit 2018, kur Brukseli zyrtar po i priste Draftin e Asociacionit të komunave me shumicë serbe, që të thotë se do ta hedhë në tavolinën e negocimit, shkëmbimin e Luginës së Preshevës me veriun e Kosovës! Aq më shumë kur në krye të shtetit shqiptar ka dy njerëzit më antikombëtar të historisë shqiptare.

Dhe kur tensionet arritën kulmin, kur Presidenti serb Aleksandar Vuçiç reagoi menjëherë duke thirr Këshillin e Sigurisë Kombëtare të Serbisë, kur  Tirana zyrtare nuk po dëgjohej, dhe kur BE dhe SHBA u alarmuan nga situata e krijuar dhe reaguan kundër idesë së një diletanti politik, që shqiptarët në Kosovë e kanë për hise ta kenë edhe president, kryeministri i Kosovës, Ramush Haradinaj, i vetmuar në botën shqiptar, sqaroi se kjo mund të jetë vetëm një taktikë presioni për bisedime sepse çdo korigjim kufijsh ose ndarje do të thotë, LUFTË!

Heshtja e Presidentit

Nuk është se kishte ndonjë pritshmëri nga shqiptarët në Kosovës që do të reagoi Ilir Meta ashtu siç u kujdes Aleksandar Vuçiç për serbët në Kosovë; Aq më shumë kur dihet se Komandant Lleshi u vra nga serbët në Luginën e Preshevës kur Meta ishte kryeministër, dhe Ambasada e Kosovës në Tiranë u mbyll pikërisht gjatë kohës kur ai ishte në krye të qeverisë shqiptare, por pritshmëria ishte për faktin se kryeministri i Shqipërisë, Edi Rama tashmë mik i Aleksandar Vuçciçit, është një diletant shumë më i madh i politikës së jashtme se sa që është presidenti i Kosovës, Hashim Thaçi, dhe se bazuar në Kushtetutën e Republikës së Shqipërisë, unitetin e popullit e përfaqëson Presidenti.

Pra, as më shumë dhe as më pak, ashtu siç thotë qartë Neni 86, Pika 1. i Kushtetutës së Shqipërisë:

“Presidenti i Republikës është Kryetar i Shtetit dhe përfaqëson unitetin e popullit”.

Në këtë situatë kur Thaçi kërkonte shkëmbim territoresh me Serbinë, Vuçiç ngriti nivelin e gatishmërisë së institucioneve të sigurisë dhe Haradinaj thoshte se shkëmbimi ose ndarja e Kosovës nënkuptojnë luftë, shqiptarët e Kosovës dhe Luginës së Preshevës e kishin të domosdoshme ta dëgjojnë nga goja e Presidentit të Shqipërisë se sido që të rrjedhin ngjarjet shqiptarët do të jenë bashk.

Pse e tha Hashim Thaçi atë broçkull në këtë moment, pak rëndësi kishte, por forcat e KFOR-it kishin filluar dislokimin e pajisjeve ushtarake në veri ndërkohë liqeni i Ujmaniut, përmes të cilit furnizohet më shumë se gjysma e Kosovës, ishte vënë në kontrollin ushtarak.

Kjo nuk ishte pak, për shqiptarët në këtë trevë shqiptare që u ambientuan nën presionet serbe dhe moskokçarjen e Prishtinës dhe Tiranës, por prania e forcave të shumta ushtarake, aq më shumë kur ato ishin amerikane, nuk ishte shenjë e mirë.

Dhe, në momentin kur Ilir Meta kishte filluar kurimin e imazhit të till qoftë me refuzimin e ca ligjeve, e që në veçanti bëri xhiron mbarëshqiptare ai i Teatrit, qoftë me ca reagime anti-Ramë dhe anti-Veliaj të zëdhënësit të tij, Tedi Blushi  dhe  qoftë me ca prezenca nëpër alpet tona të bukura shqiptare me popullin “gju më gju”, askush nuk e priste ndonjë garë që ai do të fillonte me Vuçiçin kur dihet afërsia që Meta ka me serbët, por u duhej të bindeshin se Presidenti i tyre është në detyrë, të paktën edhe me Tedin.

Pavarësisht se nuk ishte ndonjë hata sikur ta thirrte Këshillin e Sigurisë, sepse sikur edhe vetëm për këtë fundjavë administrata e Presidentit Trump të kishte filluar të mendoj siç mendoj Britania e Madhe si kryesuese e radhës në Këshillin e Sigurimit, sot Presidentit të Shqipërisë, diletanti Hashim Thaçi do t’ia uronte Republikën Srpska të Kosovës  ndërsa populli shqiptarë i Kosovës, Luginës së Preshevës dhe jo vetëm me të drejtë do të pyesnin, ashtu siç po pyesin edhe sot kur rreziku nuk ka kaluar: Ku është Ilir Meta?!