Kufijtë e Thaçit, Kurti: Lëvizja Vetëvendosje protesta më 29 shtator

Lëvizja Vetëvendosje, e cila kundërshton idetë e Presidentit të Kosovës, Hashim Thaçi, paralajmëroi sot protestë më 29 shtator.

Kryetari i kësaj lëvizje, Albin Kurti, tha se “asgjë më pak se shpëtimi i shtetit të Kosovës nuk është në pyetje. Ruajtja e integritetit territorial e institucional dhe mbrojtja e popullsisë dhe paqes në Kosovë, janë detyra jonë si qytetarë të republikës, si politikanë përfaqësues e si aktivistë politikë.

“Pasi që na e rrudhën lirinë dhe demokracinë, institucionet dhe mirëqenien, duan të na e rrudhin edhe territorin dhe pavarësinë. Duan ta ndajnë Kosovën e ta copëtojnë edhe Kosovën Lindore. Pazaret e Thaçit me Vuçiçin nuk do t’i paguajmë ne. Sepse, një popull s’i nënshtrohet një njeriu”, tha Albin Kurti

Për refuzimin e Lidhjes Demokratike të Kosovës për t’iu bashkuar kësaj proteste, Albin Kurti tha se te LDK-ja ka parë më shumë interesim për protestë sesa gatishmëri për të protestuar.