Kufiri Gjermani-Belgjikë, shqiptari 23-vjeçar kapet me 3 kg kokainë

Zyrtarët doganorë të Koblenzit në Gjermani sekuestruan më shumë se 3 kilogramë kokainë gjatë një kontrolli në kufirin belg, të një automjeti që drejtohet nga një 23-vjeçar shqiptar i cili ishte nisur për në Belgjikë.

Mediat gjermane raportojnë shoferi 23-vjeçar deklaroi se ishte nisur nga Shqipëria për në Belgjikë duke udhëtuar nëpërmjet Italisë dhe Gjermanisë. Kur u mor në pyetje, ai tha se nuk mbante asnjë lëndë narkotike. Por, meqenëse testi i drogës rezultoi pozitiv ndaj kokainës, oficerët më pas e panë automjetin e shqiptarit nga afër ku dhe gjetën në brendësi të automjetit, pak më shumë se 3 kilogramë kokainë.

“Kokaina e gjetur ka vlerën e rrugës mbi 200 mijë euro,” tha zëdhënës i shtypit në zyrën kryesore doganore në Koblenz, Thomas Molitor. Duke qenë se kishte dyshime se drejtuesi i mjetit kishte konsumuar së fundmi lëndë narkotike, edhe komisariati i Prüm nisi procedimin ndaj tij me dyshimin se drejtonte mjetin nën ndikimin e drogës.

Hetimet e mëtejshme po kryhen nga Zyra e Hetimit Doganor në Frankfurt am Main. Me kërkesë të Prokurorisë Publike të Trierit, gjyqtari hetues përgjegjës ka urdhëruar masën e paraburgimit për shtetasin shqiptar.