Kufiri shqiptaro-serb, Vuçiç: Idenë e Daçiçit e kam thënë para dy vjetësh!
Presidenti i Serbisë, Aleksandar Vuçiç, tha se ideja për “vënien e kufirit ndërmjet shqiptarëve dhe serbëve në Kosovë e Serbi është dhënë nga vetë ai që para dy vjetësh”.
Komentet e tij pasuan deklaratën e ministrit të jashtëm serb, Ivica Daçiç, i cili sot tha se propozimi zyrtar i Beogradit për arritjen e marrëveshjes me Kosovën është vënia e kufirit në vija etnike.
“Nuk kam çfarë të komentoj. Këtë e kam thënë para dy vitesh”, tha Vuçiç gjatë një vizite në një Institut shëndetësor në Beograd raporton RFE.
Duke e komentuar letrën e presidentit amerikan Donald Trump të dërguar për ditën e shtetësisë së Serbisë, në të cilën thuhej se “njohja e ndërsjellë është element kyç për normalizimin e raporteve”, Vuçiç tha se i kupton dëshirat e presidentit amerikan.
“Janë naivë ata që presin nga Amerika të ndryshojë politikën e saj, që fuqia më e madhe botërore të ndryshojë qëndrimin. Amerika e ka pranuar pavarësinë e Kosovës, mos mendoni se është e mundur që dikush të ndryshojë vendimin e saj. Prandaj une e kuptoj dëshirën e presidentit amerikan,” tha Vuçiç, duke shtuar se Serbia i ka dëshirat, nevojat dhe planet e saja.
“Duke respektuar dëshirat e të gjithëve ne do të shikojmë se si në mënyrën më të mirë të ruajmë interesat tona, të mos përplasemi me SHBA, sepse as që mundemi, dhe as që e kemi të nevojshme. Por të kuptojmë si duhet atë që Trump e thotë: bëni marrëveshje, dhe kur e arrini ndryshimin e vogël ky është një hap i madh përpara. Prej SHBA-së është vështirë të pritet më shumë se kaq. A jam i lumtur për këtë? Nuk jam”, tha presidenti i Serbisë, Aleksandar Vuçiç.
Ndryshe, sot Zv/kryeministri dhe ministri i Jashtëm i Serbisë, Ivica Daçiç tha se propozimi zyrtar i Serbisë, për zgjidhjen e çështjes së Kosovës, është “vënia e kufirit mes serbëve dhe shqiptarëve”.
Çështja e ndryshimit të kufirit mes Kosovës dhe Serbisë është përmendur disa herë edhe nga presidenti i Kosovës, Hashim Thaçi, i cili e quan këtë proces “korrigjim i kufijve”.
