Kufoma në makinën e shkrumbuar, detaje të reja për ngjarjen e rëndë

Makina me targë të Kosovës 02 960 SN hyri në Shqipëri përmes pikës kufitare të Morinës më 29 prill.

Sot, më 5 maj, automjeti u gjet i shkrumbuar mes barishteve në një tokë, në fshatin Derven të Fushë-Krujës, rreth 250 metra larg rrugës kryesore të automjeteve. Brenda saj u gjet i karbonizuar një trup  njeriu.

Policia e ka të pamundur të identifikojë se për kë bëhet fjalë, madje është i padallueshëm nëse trupi i përket një femre apo një mashkulli, për shkak se është shkrumbuar totalisht.

Rezultatet e analizës së AND-së pritet të nxjerrin se për kë bëhet fjalë.

Në një prononcim për mediat drejtori i Policisë së Durrësit, Alfred Çepe, tha se policia dhe prokuroria e Durrësit është duke bashkëpunuar me autoritetet e Kosovës, për shkak se lidhja e vetme që bëhet me këtë shtet janë targat.

“Specialistët për Krimet në bashkëpunim me Prokurorinë e Rrethit Gjyqësor Krujë po punojnë për identifikimin e personit të djegur dhe zbardhjen e plotë të shkaqeve të ngjarjes”, tha Policia në një njoftim paraprak.

Nuk dihet ende nëse personi është vrarë më parë me armë zjarri, apo nëse është djegur i gjallë brenda automjetit.

Ekspertiza mjeko-ligjore pritet të hedhë dritë mbi ngjarjen.