Kujdes, po vjen Likja!
nga Agim Popoci
Kur fundi i krizës në Partinë Demokratike ishte në horizont dhe filluan të cenohen sërish planet e Serbisë me hyzmeqar Edi Ramën, rishfaqet plangprishësi dezhurn i shqiptarëve, Ilir Meta, aktualisht Presidenti i Republikës që ndër miqtë e tij njihet si, Likja, duke e lënë në plan të dytë rëndësinë e datës së mbajtjes së Kuvendit të PD, 11 ose 18 Dhjetor! Pse?!
Me fillimin e “Foltores” Ilir Meta ishte në punë të vetë presidenciale, por kur kjo iniciativë e liderit historik të PD u masivizua dhe sondazhet tashmë po dëshmojnë rikthimin e demokratëve tek Sali Berisha, Likja u shqetësua si zakonisht pasi u shqetësua edhe Serbia!
Por ky nuk është roli i parë përçarës serbofil i Likes në tokën shqiptare jo vetëm pse na tregoi se sa i ligë është Lulzim Basha dhe sa ndere i kishte bërë ai për të mirën e Shqipërisë!
Kështu Likja veproi me çlirimin e Kosovës, ardhjen në pushtet të së djathtës, zgjedhjeve historike të 25 Prillit për rikthimin e të djathtës në pushtet dhe së fundi rizgjimin e të djathtës, të cilën e kishte asfiksuar Edi Rama dhe jo vetëm!
Moslejimi i Sali Berishës në Kosovë nga UNMIK-u, në qershorin e vitit 2000 për shumë kënd u arsyetua me çështje sigurie por në nëntorin e po këtij viti, kur vrulli opozitar i Doktorit po shkonte në rritje ai u arrestua po nga ky Likja që ishte indiferent ndaj vendimit të UNMIK-ut!
Dhe, si Kryeministër, Likja vazhdoi me lëvizjet e tij proserbe duke mbyll Ambasadën e Kosovës me arsyetimin se kishte presion nga UNMIK-ut, gjë që shumë shpejtë u përgënjeshtrua. Likja thjeshtë po mbyllte një frengji diplomatike kosovare e cila po luante një rol të rëndësishëm ndër diplomatë të akredituar në Tiranë, në promovimin e domosdoshmërisë së krijimit të shtetit të Kosovës. Më vonë rezultoi se kjo kishte qenë kërkesë e Beogradit zyrtar!
Dhe, jo vetëm kaq! Flirtin me Serbinë, Likja nuk e ndaloi me mbylljen e kësaj Ambasade. Linja ajrore Beograd-Tiranë ishte një sukses i madh i Serbisë që lumturoi Liken i cili po negocionte me Kryeministrin serb Gjingjiç për ndarjen e Kosovës, flirt të cilin e përforcoi edhe me krijimin e shtetit të ri. Serbia dhe Mali i Zi.
Veton për pranimin e këtij shteti në OSBE, Likja me shefin e tij të diplomacisë e konsideroi primitivizëm por ishte pikërisht ky “modernizëm” i Likes i cili edhe sot po e dëmton shtetin e Kosovës, që falë vetos së Beogradit zyrtar nuk anëtarësohet dot në OSBE!
Rikthimi i PD-së në pushtet prishi shumë plane serbe të cilat nuk u jetësuan dot as me përpjekjet e Edi Ramës dhe Likes për të penguar anëtarësimin e Shqipërisë në NATO!
Ndonëse SHBA ishte e qartë me planet e saj për prezencën në bregdetin e Adriatikut, asnjë nga obstruksionet e sajuara nuk penguan projektet amerikane për përmbyllen e MSA-së, shpalljen e pavarësisë së Kosovës dhe anëtarësimin e Shqipërisë në Aleancën Veriatlantike.
NATO në Tiranë ishte e qartë se do të thotë një Kosovë e sigurt, dhe ky vendim madhor i Amerikës nuk u minua dot nga serbët as me Gërdecin të cilin e dhuruan tre ditë para pranimit të Shqipërisë.
Çfarë do të thotë “kur vjen Likja” u konfirmua në Janarin e vitit 2021 ku korrupsioni i shoqëruar me një protestë të dhunshme socialiste prodhoi një situatë të nderë, që u finalizua me një Marrëveshje në Shkodër, e cila për noter kishte Presidentin e Serbisë, Boris Tadiç, dhe lindi një koalicion qeverisës që rrëzoi Berishën nga froni i kryeministrit.
Berisha pa pushtet nënkuptonte një Kosovë e brishtë, dhe për lehtësimin e realizimit të projekteve serbe, aty ishte Likja!
Lideri i ri opozitar, Lulzim Basha, nuk arriti të “përkthej” politikën serbofile të Likes e cila u kujdes për mirëqenien e kryeopozitarit deri te kunati. Protesta e 3 Marsit dhe zgjedhjet e 25 Prillit dëshmuan se e gjithë kjo sajdisje e kryeopozitarit ndër vite kishte qëllime të caktuara, për të cilat nuk ishin kujdesur ata që po synonin pushtetin; E Beogradi, gjatë gjithë kësaj kohe punoj me shumë seriozitet në mbytjen e imazhit të Sali Berishës përmes hyzmeqarit Edi Rama dhe krijimit të një realiteti të ri vizual ndër shqiptarë për të ardhmen e tyre, pse jo me Kosovë të ndarë!
Ndoshta gjatë kohës së mbushjes së gotës së Bashës nga Likja, kryetari i PD edhe nuk mund të fajësohet, por përdorimi i shëmtuar i tij më 3 Mars nga ana e Likes ishte dhe momenti që Lulzim Basha duhej të divorcohej nga ky serbofil, antidemokrat dhe antamerikan që krijoi dhe idenë se mbushi sheshin me planet e tij mbi shpërbërjen e parlamentit dhe luftën që i kishte “shpallur” Edi Ramës.
Përplasja me Ambasadoren e SHBA, Yuri Kim, në prag të zgjedhjeve të 25 Prillit në emër të opozitës ishte një kosto që iu var kot në qafë Partisë Demokratike, dhe në mungesë të distancimi të prerë, ajo dhe pësoi në zgjedhjet parlamentare.
Pse heshti Lulzim Basha ai më mirë e din por është fajtori kryesor pse e la të pësoi PD-ja për shkak të një njeriu pa fe dhe atdhe; Ama në asnjë mënyrë, arsye nuk mund të jetë afërsia që ishte krijuar dhe për të cilën sot flet Likja! Me goca e me Mona në shtëpinë e tij në Lalëz pranohet vetëm miku, e pse Likja nuk e ka të qartë se çfarë është ai që fut në shtëpi, për këtë nuk mund të fajësohet Basha!
Kryetari i PD sot mund të fajësohet pse nuk e trajtoi Liken thjeshtë si një të majtë, pastaj si një serbofil dhe në fund një njeri që urren Partinë Demokratike, bazuar në të kaluarën e tij politike, dhe lejoi që përafrimin në frontin opozitar Likja ta keqpërdor për imazhin e dinastisë politike që krijon një realitettë ri dhe është ajo që vendos.
Sot, kur ujërat në PD u qetësuan, kur nuk diskutohet se cili është fituesi, sërish nxjerr kokën Likja, duke paralajmëruar se po vjen. Ky është rreziku më i madh jo vetëm për PD-në, por për Shqipërinë, Kosovën dhe mbarë kombin shqiptar!
Likja sulmoi Bashën, impianti mediatik i Edi Ramës e përkthej si përafrim te “Foltorja” e Sali Berishës por fjalën përfundimtare tashmë nuk e kanë as Likja dhe as as Basha, por, demokratët. Po, edhe ata që i dolën në krah më 3 Mars, respektuan thirrjen e liderit të tyre Lulzim Basha, dhe nuk kishin respekt as për veten e tyre! Sot, nuk është vonë, është koha që të mos i japin as mesazh dhe as leksion asnjë njeriu, mjafton që në këto momente vendimtare, para 11 dhe 18 Dhjetorit, të paktën ti thonë vetes: Kujdes, po vjen Likja! Pra, po vjen Serbia…
