Kumbara i Putinit themeloi “Ukrainën e Dytë” në Serbi

Mediat ruse raportojnë se lëvizja “Ukraina e Dytë“ e oligarkut ukrainas dhe politikanit prorus, Viktor Medvedçuk, përndryshe kumbar i Vladimir Putinit, ka regjistruar përfaqësinë në Serbi.

Degën në Serbi e ka themeluar para dy muajve, saktëson media ruse Oktagon ndërsa biznesmeni serb nga Ukraina, që është dhe përfaqësues i kësaj shoqate në Serbi, Dragan Stanojeviç, e konfirmon për të përditshmen serbe “Danas”:

“Po, ky informacion është i saktë!”

“Ukraina e Dytë“ është e regjistruar në Agjencinë e regjistrave të biznesit, APR, që shihet dhe në këtë dokument:

Stanojeviç sqaron për “Danas” se u bë përfaqësues i “Ukrainës së Dytë“ për shkak të lidhjeve që ka krijuar gjatë qëndrimit në Ukrainë.

“Njoh sistemin politik në Ukrainë. Formalisht dhe juridikisht unë jam përfaqësues, por organizata u takon plotësisht atyre,” tha Stanojeviç, duke menduar për Medvedçukun dhe 15-20 gazetarë, politikologë dhe aktivistë nga Ukraina, që janë prapa kësaj shoqate.

Qëllimi i kësaj shoqate, thotë Stanojeviç, është integrimi i ukrainasve që mendojnë ndryshe nga qëndrimi zyrtar, në shoqërinë serbe.

“Idea është që ukrainasit që janë Serbi të gjallërojnë, që të vërtetohet nëse u duhet ndonjë ndihmë. Ky është shqetësim për njerëzit të cilët janë jashtë Ukrainës,” thotë Stanojeviç i cili vlerëson se ky nuk është rrëfim politik por shoqëror.

Dragan Stanojeviç thotë me këtë rast se në Serbi ka shumë organizata për ndihmë ukrainasve që klasifikojnë njerëzit nëse janë prorus ose proukrainas.

“Nëse dëshironi ti ndihmoni njerëzit nuk mund t’ju numëroni rruazat e gjakut. Ky nuk është qëllimi i Përfaqësisë sonë. Ne duam t’i ndihmojmë të gjithë pavarësisht ideolgjisë politike që kanë,” rithekson Stanojeviç.

“Edhe Zelenskyy është kumbar i dikujt“

Meqë prapa gjithë kësaj iniciative qëndron pikërisht kumbara i Putinit dhe çfarë përshtypje krijojnë njerëzit që eventualisht do të vendosin të paraqiten në këtë Përfaqësi, Stanojeviç thotë se këtu nuk ka asgjë të keqe, dhe, se, edhe Presidenti i Ukrainës, Volodymyr Zelenskyy është kumbar i dikujt.

„Edhe deputeti i Ukrainës, Petro Poroshenko ishte partner i kumbarit të Putinit, dhe kjo nuk i pengoi njeriu. Putin në disa raste ka folur për Medvedçukun se është nacionalist ukrainas,“ thotë Stanojeviç.

Ukraina e Dytë në Rusi

Sipas të përditshmes ruse “Oktagon”, themelimi i projektit “Ukraina e Dytë“ e Viktor Medvedçukut u paralajmërua në muajin prill të këtij viti.

Lëvizja publike ndërkombëtare për zhvillimin e shoqërisë civile “Ukraina e Dytë“ zyrtarisht është regjistruar në muajin qershor në Moskë.

Verën e këtij viti organizata ka angazhuar avokatë për çështje të migrimit, specialistë për telefona dezhurnë në qendrat për ndihmë ukrainasve dhe menaxherë për punësim, shkruan media ruse.

Qëllimet e deklaruara të projektit janë “legalizimi, adaptimi social, punësimi“ dhe ndihma të tjera për qytetarët e Ukrainës. Aktualisht janë pesë qendra të këtij lloji – në Moskë, Rostov në Don, Krasnodar, Belgorod dhe Simferopolj. Organizata premton dhurata falas për Vitin e Ri 2024, për fëmijët e të gjithë ukrainasve që paraqiten.

Kush është Viktor Medvedçuk?

Viktor Medvedçuk është politikani opozitar 69-vjeç i Ukrainës, të cilin Kievi e ekstradoi në Moskë në shtatorin e vitit të kaluar në shkëmbim me luftëtarët e arrestuar të batalionit Azov.

Nga viti 2002 deri në vitin 2005, Medvedçuk ishte shef i kabinetit të Presidentit të Ukrainës, Leonid Kuçma.

Njëherit është njëri ndër njerëzit më të pasur në Ukrainë, e Forbs e ka vlerësuar pasurinë e tij 620 milionë dollarë.

Në opinionin serb ai njihet më së shumëti nga lajmi për jahtin e tij në Kroaci, i cili ishte ankoruar në Rijekë kur shpërtheu konflikti në Ukrainë.

Putini dhe kumbara

Oligarku ukrainas, Medvedçuk, ka lidhje kumbarie me Presidentin rus Putin.

Për herë të parë janë njohur në vitin 2003 kur Medvedçuk ishte në postin e shefit të administratës së Presidentit të Ukrainës.

Në vitin 2004, Putin u bë kumbarë i vajzës më të re të Medvedçukut, Darjës.

Medvedevçuk është nën sanksione amerikane që nga pushtimi rus i Krimesë në vitin 2014, e Ukraina e arrestoi vitin e kaluar për shkak të tradhtisë kombëtare dhe plaçkitjes së resurseve shtetërore në Krime, të cilën Rusia e bashkoi në mënyrë antiligjore në vitin 2014.

Për Medvedçukun thuhet se është themelues i një kompanie avokatie me seli në Kiev.

I njohur është edhe si njëri prej anëtarëve i të ashtuquajturës “Kyiv Seven” , grupit i cili përbëhej nga shtatë biznesmenë shumë të suksesshëm: Viktor Medvedçuk, Valentin Zhurski, Grigorije dhe Igor Surkis, Bohdan Hubski, Jurij Karpenko dhe Jurij Lijah.