Kundër Anti-KÇK, Rama: Ka media e analistë që paguhen nga krimi i organizuar për t’iu bërë avokatin!

Duke folur për paketën “Anti-KÇK”, Kryeministri Edi Rama sërish e lidhi me gjyqtarët dhe prokurorët e korruptuar ndonëse deri më sot nuk janë prekur nga OFL, ndërsa nga foltorja e Parlamentit sulmoi mediat duke e cilësuar si “zhurmë” kërkesën pse pse goditja nuk nisi nga politikanët.

“Ne kemi kaluar një ligj, që i jep policisë në dorë dy gjëra të rëndësishme, së pari të veprojë me një listë të mbyllur, që do të thotë se subjektet e kësaj liste janë njerëzit e dënuar për një numër veprash, që janë veprat më të rënda, të cilëve nuk ju hapet një hetim penal sot, por iu bëhet një verifikim i pasurisë, që nuk iu është bërë kurrë; e dyta nuk është policia, apo prokuroria, por janë këta që duhet të provojnë se kjo pasuri nuk buron nga krimi. Ke vrarë, ke trafikuar njerëz, vajza, drogë, armë, ke bërë dënimin apo je duke bërë dënimin, duhet të na thuash si i ke vënë këto pasuri, a të takojnë apo jo. Ti je i lirë, je dënuar, e ke kryer dënimin, por ti do të gëzosh ato që të takojnë, jo ato që s’të takojnë,” tha Edi Rama ndërsa akuzoi rëndë kritikët e ligjit Anti-KÇK:

“Ka një zhurmë të madhe nga ata që e kundërshtojnë paketën, nga media e analistë që paguhen nga krimi i organizuar për t’iu bërë avokatin, dhe thonë ‘pse nuk e filloni nga vetja, nga Surreli’. E di që më doni në burg, por nuk mund të hetoj unë pasurinë time, pra nuk jemi ne që e bëjmë këtë. Inspektorati i Deklarimit të Pasurive është aty për të kontrolluar pasurinë tonë. Nuk është policia që duhet të kontrollojë pasuritë e politikanëve apo të gjykatësve. Nuk është qeveria, larg qoftë, që duhet të kontrollojë pasuritë e politikanëve apo gjykatësve, se nuk jemi në vitin 1945,” tha Edi Rama ndërsa veprimet e OFL nuk dallojnë fare nga ata të partizanëve të ’45-ës, vetëm nëse Akti Normativ mund të quahet nuancë sepse ligjore nuk është fare .

Në fund, foli dhe për ata që i kanë rënë çangës pa lejen e Edi Ramës:

“Vettingu nuk është gjykatë që të çon në burg, është një proces që vendos që je në rregull, i ke duart e pastra për të marrë atë çekiçin dhe për t’i rënë çangës, apo i ke duart pis dhe del nga sistemi. Dhe pastaj ata njerëz me duart të pastra do t’i thërrasin këta me duart të pista dhe do u thonë se ka ardhur dita të provoni se pasuritë i ke bërë me djersën e ballit, ndryshe jo vetëm që nuk të takojnë, por nuk je më për të fjetur në shtëpi, por do shkosh të flesh me shokët, me ata që ke bërë pasuritë.”