Kundërshtime rreth rezolutës për dialogun me Serbinë
Debati rreth rezolutës për dialogun me Serbinë ka vënë në pah kundërshtimet që kanë partitë parlamentare në Kosovë dhe përfaqësuesit e popullit.
Kështu deputeti i Lëvizjes Vetëvendosje, Liburn Aliu duke kundërshtuar rezolutën e PSD-së për dialogun me Serbinë tha se duhet treguar se për çka konkretisht do të bisedohet në dialog.
“Meqë qenkan përfundimtare dhe u dashkan të ndodhin, a mund të na tregojnë nënshkruesit e rezolutës se për çka do të negociohet. Jo vetëm Visari, por secili deputet, meqë qenkan shumë që nuk janë dakord për vazhdimin e bisedimeve, a na tregoni se për çka konkretisht do të flitet në këto bisedime, cila e drejtë ka mbet pa iu dhënë pakicës serbe”, tha ai.
Aliu tha se në rezolutë procesi i dialogut quhet se ka arrit në fazën përfundimtare, dhe se konsiderimi si i tillë i procesit negociator nënkupton pajtim me fazat paraprake, pa ndërprerje të këtyre negociatave të filluara dhe pa trajtim të proceseve të deritanishme.
“Ju keni ndryshuar shumë për të keq, se nuk jeni më VV këtë e di, por se sillni rezoluta e tekste thua kurrë nuk keni qenë me VV nuk e kisha besu. Këtë tekst ende nuk mund të besoj se e keni shkruar ju, po dyshoj se e ka shkruar dikush tjetër, kërkoj ta tërhiqni këtë rezolutë dhe të flasim tamam shtruar dhe jo të mbështet ky proces i dëmshëm dhe të luhet naivi”, tha Aliu.
Ndërsa sipas deputetit Visar Ymeri, një diskutim i tillë tregon sa e rëndësishme është që Kuvendi ta shkruajë platformën e strategjinë, që siç tha ai kjo mos t’i lihet një grupi të vogël njerëzish, apo Thaçit.
“Duhet të mirret mandati, kushdo që negcion me dy të tretat në Kuvend, dhe ky nënkupton për Kuvendin dhe Rpeublikën e Kosovës fillim i procesit negociator, deri tash ka shkuar Thaçi në takime por ky Kuvend me këtë rezolutë e tregon se ai nuk është legjitim, dhe nënkupton që ky proces negociator nuk pranohet, ose ai që ka ndodh deri tash. Këto janë ato që janë paraparë në rezolutë nëse lexon me vëmendje, por për të lexuar me vëmendje duhet hequr këtë inat karshi PSD-së dhe vullnetin për me sulmu PSD-në dhe me mëndu drejtë, tash nëse ti nuk i beson dy të tratave të Kuvendit, ose nuk e ke besimin tek PSD, që thua se PSD mund ta ndryshojë votën, e unë këtu po të garantoj që ne nuk e ndryshojmë votën karshi këtyre çështjeve, ose nuk e ke besimin tek LDK”, tha ai duke shtuar se është e rëndësishme të testohet LDK-ja në fillim të procesit e jo në fund.
Ndërsa Avdullah Hoti në replikën e tij tha se me rezoluta të tilla nuk shkohet askund, dhe se nuk ka parti në Kuvendin e Kosovës që mund ta testojë LDK-në.
“Nuk ka parti, në veçanti këto që tash kanë filluar me tregu veten që munden me testu LDK-në. Me rezoluta të tilla nuk shkojmë askund, mendoj që është parë në javët e fundit në këtë Kuvend se kush po i ndërron qëndrimet. Ka 30 vjet që LDK nuk i ndërron qëndrimet për shtet të pavarur të Kosovës”, tha Hoti.
Haradinaj: Parlamenti duhet të marrë në dorë procesin e dialogut
Kryeministri Haradinaj duke informuar deputetët për raportin që ua ka përcjell lidhur me dialogun më Serbinë tha se Parlamenti duhet të marrë në dorë procesin e dialogut të fazës përfundimtare.
Haradinaj ka thënë se duhet të bashkohen të gjitha partitë politike për këtë fazë. Ai ka thënë se kjo temë do të marrë një epilog dhe se duhet të përfshihen të gjithë, dhe më pas mos ta vajtojmë këtë epilog.
Haradinaj: Jepni kontributin tuaj për këtë proces
“Jepeni ju vendimin për procesin, merrni procesin, mos mendoni që në këtë kohë mund t’i lajmë llogaritë me njëri tjetrin, llogaritë e brendshme politike vazhdojnë tërë jetën, por në këto tema të ndjeshme si kjo analizone si ta nxjerrim temën në këtë kohë. Ju kisha lutë keni kujdes, të gjithë vendimmarrësit, qofshin të nivelit botëror, qofshin të kontinentit tonë, nëse e kanë paraparë një kohë të caktuar për temën tonë, në fund do të ja japin një epilog kësaj teme, në fund të kohës së caktuar, ne do të jetojmë me atë epilog”, tha Haradinaj duke theksuar në fund se duhet pranuar epilogu i kësaj çështje, prej kujtdo që i është lënë në duar ky proces.
“Nëse nuk e japim kontributin tonë, në duar të kujtdo që e leni, nëse e leni në duar të qeverise ose institucioneve do të jetoni me kontributin që e kanë dhënë institucionet. Nëse hyni edhe vet merrni përgjegjësi do të jetojmë me kontributi në e kemi dhënë të gjithë”, tha ai.
Debati për dialogun është duke vazhduar ende në Parlamentin e Kosovës…
