Kundërvajtjet rrugore, raporti: Policia masa për fotografimin, do të ulë numrin e ankimimeve
Procesverbalet e policisë që konstatojnë shkeljet rrugore duhet të shoqërohen me foto, si një formë për të ulur numrin e ankimimeve.
Një auditim i Kontrollit të Lartë të Shtetit që analizon pjesën teknologjike dhe të informacionit në sistemet e Drejtorisë së Përgjithshme të Policisë së Shtetit nënvizon se ka aspekte që duhet të përmirësohen.
“Nga auditimi mbi procesverbalet e konstatimit të shkeljes, u konstatua se fotografimi nuk është bërë pjesë e formularit të miratuar për kundërvajtjen, miratuar me VKM nr. 42, datë 30.01.2019. Fotografia është prova që vërteton shkeljen e konstatuar.
Mungesa e kësaj prove në informacionin që i vihet në dispozicion kundërvajtësit nëpërmjet shërbimeve online në eAlbania, bën që të ketë një numër të lartë ankesash në këtë drejtim” thuhet në auditim.
KLSH sa i takon kësaj ka rekomanduar që Drejtoria e Përgjithshme e Policisë së Shtetit, të marrë masa për shtimin e fotos së kundërvajtjes për mjetin e konstatuar pa prezencë të shkelësit e cila aktualisht nuk është pjesë e formularit të miratuar për kundërvajtjen, me qëllim minimizimin e ankesave, minimizimin e kohës së trajtimit dhe përgjigjes së tyre, nisur nga fakti që fotografimi i shkeljes është një nga provat që vërteton kundravajtjen.
Një tjetër konstatim i audituesve ka qenë numri i lartë i vakancave të paktën 32 vende.
Në këtë kontekst është kërkuar që të merren masa për plotësimin e vendeve vakante në strukturën e Departamentit të Teknologjisë së Informacionit, si dhe plotësimin e strukturës së Auditit të Brendshëm me punonjës të fushës së Teknologjisë së Informacionit.
KLSH është ndalur edhe tek sistemi eGjoba ku është kërkuar që Drejtoria e Përgjithshme e Policisë së Shtetit si Autoritet Përfitues i shërbimeve të informatizuara në sistemin eGjoba, në mungesë të punonjësve që kanë vepruar si ndjekës të kontratave të sistemit eGjoba, të ngrejë një grup specialistësh me qëllim verifikimin e çështjeve që nuk janë realizuar në kontratën e parë nga operatorët ekonomikë, i cili është aktualisht i kontraktuar për kontratën aktuale. Mangësitë të përcillen tek AKSHI si Autoritet Kontraktues për sistemin eGjoba dhe përmirësimin e tij.
Po kështu sipas KLSH Drejtoria e Përgjithshme e Policisë së Shtetit si Autoritet Përfitues i shërbimeve të informatizuara në sistemin eGjoba, duhet të përcjellë tek AKSHI si Autoritet Kontraktues, mangësitë në zbatimin e kontratës për përmirësimin e sistemit eGjoba në zbatim të kontratës nr.20, datë 16.08.2022, të cilat jo vetëm nuk janë realizuar, por kanë penguar veprimet operacionale të nevojshme për Drejtorinë e Policisë Rrugore Drejtorisë së Policisë Rrugore./Monitor/
