Pa Kryeministrin, Basha: Rama para dy ditësh udhëtoi me charter që do 150 mijë € karburant!
Kur mungon Kryeministri Edi Rama në Parlament, edhe opozita e Lulzim Bashës me mbështetësit e tij është ndryshe. Pasi zhvendosi në ulëset e fundit deputetët që nuk i binden, dhe në mungesë të Kryeministrit, kryetari i shkarkuar i PD e kishte më të lehtë të flas marrëzira kundër njeriut që nuk ishte prezent dhe me të cilin, Komisioni i Rithemelimit të PD thekson se po bashkëqeveris çdo projekt madhor që po zhvillohet në Shqipëri.
“Dua ta nis me pyetje retorike, si ka mundësi që në seancën e javës, të ngarkuar me vendime të sjella nga vetë qeveria, në një javë të mbushur me skandale, që do të trondisin e do të rrëzonin qeverinë normale në vende normale, këtu nuk ndodhet as 1/3 e deputetëve? Ku është kryeministri? E dimë që para dy ditësh shkoi e erdhi me charter privat, duke harxhuar 120 apo 150 mijë euro karburant. Shkon e vjen me një charter luksoz, ku vetëm karburanti kushton minimumi 150 mijë euro. Dhe kur vjen puna për t’u përballur me shqiptarët, nuk e dimë ku është. Me cilin vend të Evropës, mos të them të botës, në 2022, mungon transparenca minimale për shpenzimet marramendëse qeveritare të një populli që është në varfëri të thellë,” thekson Lulzim Basha i cili akuzon Edi Ramën për mungesë transparence por as vetë nuk thotë ku shkoi Kryeministri dhe me charter të kujt udhëtoi.
“Në cilin vend të botës kryeministri ka charter privat, shkon drejt kryeqyteteve luksoze të Evropës, ndërkohë që qeveria e tij pa asnjë mandat dhe në kundërshtim me ligjin shemb catitë e banorëve të kryeqytetit, sic ndodh te “5 Maji”, ku pjesa dërrmuese e banorëve janë në gjendje lufte, sikur i ka bombarduar një armik, një armiku i padukshëm, por i tmerrshëm, i korrupsionit qeveritar,” tha Basha por duke mos i dhënë përgjigje banorëve të 5 Majit të cilët e akuzuan pak çaste më parë se bashkëpunon me Edi Ramën.
Gjithsesi, kaq i mjaftojnë Lulzim Bashës i cili gjyqin e ka më 2 Shkurt dhe dje publikoi lajmin se Gjykata është shprehur se ai është kryetar:
“Mjaftojnë këto fakte për të kuptuar pse dy ditë më parë raporti i Ti konfirmoi që qeveria e masakrës zgjedhore të 25 prillit është qeveria më e korruptuar e Evropës, më e korruptuara e Ballkanit. Pndërshmëria, paligjshmëria, largimi i cdo shërbimi nga qytetarët, cveshja e institucioneve për t’i shërbyer qytetarëve dhe kthimi i tyre në duart e një grushti njerëzish, këto nuk janë fjalët e opozitës, por janë të vërteta të pamohueshme, me të cilat cdo njeri në marrëdhënie pune, cdo i papunë, cdo sipërmarrës, cdo fermer, cdo student e pensionist, përballet cdo ditë. Korrupsioni është armiku i përditshëm. Korrupsioni ka shkatërruar institucionet, ka deformuar vendimmarrjen, ka shkatërruar tregun, ka penguar avancimin në rrugën drejt BE,” tha Lulzim Basha duke u shprehur nga foltorja e Parlamentit sikur bënë opozitë me denoncimin e check-upit, tenderave të ARRSH, inceneratorët por jo dhe Portin e Durrësit për të cilin është akuzuar por ka heshtur:
“Shikoni vetëm ngjarjet e javëve të fundit. Shikoni faktet që ka depozituar PD për check-up e famshëm, që vazhdon si një hemorragji dhe nuk ndalet as në kohë pandemie. Shikoni raportimin e përditshëm të tenderave në ARRSH. Për të ardhur tek afera e shekullit, inceneratori, që kanë shkrumbuar e shkrumbojnë paratë e shqiptarëve. Ndërkohë që dje janë shpallur në kërkim ndërkombëtar dy pjesëtarë të kësaj afere. Një ditë përpara e kam paralajmëruar disa herë që do të zhduken, do të shkojnë në arrati, se dinë shumë, dhe dinë ato që s’duan t’i dinë, tani janë në kërkim ndërkombëtar. Ndërkohë që ata janë në kërkim ndërkombëtar, kjo qeveria vazhdon të paguajë skenat e krimit, që janë me shirit të verdhë.”
