Kurban Bajrami, H.Bujar Spahiu: Mesazh paqe, përhapeni atë!

Duke uruar të gjithë besimtarët myslimanë festën e Kurban Bajramit, kreu i Komunitetit Mysliman të Shqipërisë, H.Bujar Spahiu thekson se ky Bajram na jep mesazhin që, për të arritur pëlqimin dhe kënaqësinë e Zotit të Madhërishëm, është i nevojshëm sinqeriteti dhe devotshmëria.

“Therni Kurbanin nesër, kushdo që ka mundësi, dhe ndajeni atë me njerëzit në nevojë. Kjo vërtetë është një punë e pëlqyeshme të Zoti. Kurbani është mesazh paqe, përhapeni atë. Kurbani është gëzim për fëmijët, gëzojini ata me dhurata. Kurbani është pajtim, pajtohuni dhe faleni njëri-tjetrin,” tha H.Bujar Spahiu në mesazhin e tij për Kurban Bajram duke lutur Zotin të na i pranojë kurbanet, adhurimin dhe lutjet tona.

Ndërkohë Komuniteti Mysliman i Shqipërisë bënë të ditur se Kurban Bajrami është nesër, më 20 korrik 2021 ndërsa Namazi i Bajramit do të falet në Sheshin “Skënderbej” në Tiranë me këtë program:

05:50 Hapja e programit

05:55 Këndim Kurani, Imami Bilal Teqja

06:00 Fjala përshëndetëse e Kryetarit të KMSH-së, H. Bujar Spahiu

06:10 Ligjërata e Nënkryetarit të KMSH-së, z. Taulant Bica

06:20 – Falja e Namazit, prin Kryetari i KMSH-së, H. Bujar Spahiu

06:25 – Hutbeja e Bajramit, Myftiu i Tiranës, z. Lauren Luli

Mesazhi:

Bismilahi-Rrahmani-Rrahim

Me emër të Zotit Mëshiruesit-Mëshirëbëres.

Falënderimet i takojnë Allahut, Krijuesit të botëve.

Paqja dhe bekimi i Zotit qofshin mbi Muhamedin (a.s.)

Të dashur qytetarë, nesër, më datë 20 korrik 2021, është festa e Kurban Bajramit.

Allahu i Madhërishëm në suren Kevther në Kuran thotë:

“Ne vërtet të dhamë ty shumë të mira. Andaj ti falu dhe ther kurban për hir të Zotit tënd!”

Ndërsa në suren En’nam na kujton:

“Thuaj: namazi im, kurbani im, jeta ime dhe vdekja ime janë thjesht për Allahun, Zotin e botëve!”

Të dashur besimtarë, edhe pak orë na ndajnë nga festa.

Kurban Bajrami është një festë e rëndësishme në fenë islame.

Në këtë ditë ne përkujtojmë sakrificën e Ibrahimit (a.s), durimin e pa shembullt të Ismailit (a.s.), atëkohë vetëm një fëmijë, dhe dhembshurinë e nënës heroike Haxhires.

Kurbani na dëshmon se, sakrifica, durimi dhe dhembshuria njerëzore, janë punë të pëlqyeshme te Zoti, nëse duam të përfitojmë mëshirën dhe faljen e të Gjithëmëshirshmit absolut, Zotit të gjithësisë.

“As gjaku e as mishi i kurbaneve tuaja nuk arrin tek Allahu, por tek Ai arrin devotshmëria juaj”, thotë Zoti (xh.sh.) në Kuranin Famëlartë.

Ky Bajram na jep mesazhin që, për të arritur pëlqimin dhe kënaqësinë e Zotit të Madhërishëm, është i nevojshëm sinqeriteti dhe devotshmëria.

Therni Kurbanin nesër, kushdo që ka mundësi, dhe ndajeni atë me njerëzit në nevojë. Kjo vërtetë është një punë e pëlqyeshme të Zoti.

Kurbani është mesazh paqe, përhapeni atë.

Kurbani është gëzim për fëmijët, gëzojini ata me dhurata.

Kurbani është solidaritet, jini solidarë në bajram e në çdo ditë.

Kurbani është pajtim, pajtohuni dhe faleni njëri-tjetrin.

E lusim Zotin të na i pranojë kurbanet, adhurimin dhe lutjet tona.

E lusim Zotin për paqe e prosperitet në vendit tonë dhe mbarë njerëzimin.

Ju dëshiroj paqe, begati e mirësi në familjet tuaja!

Amin!