Kurti anulon rritjen e pagës 100 %, Haradinaj: Mashtrim ordiner!

Pas vendimit të Albin Kurtit për anulimin e dia vendimeve të Qeverisë Haradinaj, ndër të cilat edhe anulimi i rritjes së pagës së Kryeministrit dhe ministrave 100 %, ka reaguar ashpër Haradinaj duke e quajtur mashtrim ordiner për tituj portalesh që të fitojnë ca pikë politike, në kurriz të parimit themelor kushtetues të vendit.

“Ulja e pagave të Kabinetit të sotëm është veprim politik tërësisht i pakuptimtë kur dihet tanimë që brenda pak ditëve pritet aktgjykimi përfundimtar i Gjykatës Kushtetuese rreth Ligjit që rregullon jo vetëm pagat e këtij kabineti, por edhe atyre të ardhshëmëve, dhe se pagat edhe për këtë muaj do u dalin të gjithëvë ashtu siç ishin. Mashtrimi ordiner me këtë veprim të sotëm, bëhet për tituj portalesh që të fitojnë ca poena të shpejtë politik, në kurriz të parimit themelor kushtetues të vendit,” thekson Ramush Haradinaj në reagimin e tij përmes rrjetit social Facebook duke e konsideruar si standard të ri, të rrezikshëm dhe jodemokratik.

Nuk është e qartë se cili është kuti i vlerësimit të standardeve të reja, të rrezikshme dhe jo demokratike që përdor Ramush Haradinaj, por rritja 100 % e pagës nga vet Kryeministri para 25 muajve, duke pasur parasysh rrogat e kryeministrave të Ballkanit të varfër, nuk është standard, shumë i rrezikshëm dhe nuk ka lidhje me demokracinë!