Kurti: Dialogu ka vështirësuar njohjen nga pesë shtetet e BE

Kryetari i Lëvizjes Vetëvendosje, Albin Kurti tha se duhet ndërprerë dialogu me Serbinë, i cili sipas tij është pa mandat ndërsa bëri thirrje që të përcaktohen synimet e Kosovës si dhe kërkesat ndaj Serbisë.

Ai konsideron që dialogu i deritanishëm ka ndikuar në mos-njohjen e Republikës së Kosovës nga pesë vende anëtare të Bashkimit Evropian.

“Duhet ta ndërprejmë këtë lloj të dialogut pa mandat, së treti duhet t’i definojmë synimet e Kosovës dhe kërkesat tona ndaj Serbisë. Disa prej këtyre kërkesave mund të bëhen edhe kushte ndaj Serbisë, por jo të gjitha kërkesat janë kushte, por çdo kusht është edhe kërkesë, dhe vetëm kërkesat që nuk janë edhe kushte, bëhet tema të dialogut, kërkesat që janë edhe kushte i paraprijnë dialogut, Dhe krejt në fund bëhet ekipi ynë negociator me udhëheqësin dhe strategjinë e cila nuk do të duhej të jetë publike. Krejt në fund, dialogu i deritanishëm neve na e ka vështirësuar njohjen prej pesë shteteve të Bashkimit Evropian, që nuk na kanë njohur, për shkak se ato po presin marrëveshjen me Serbinë, tash e shtatë vjet janë duke pritur marrëveshjen  tonë prandaj edhe nuk janë duke na njohur” tha Kurti.

Kryetari i Vetëvendosjes tha se kërkojnë fillimisht shqyrtimin e marrëveshjeve të deritanishme. Sipas tij, nëse ka pasur lëshime, atëherë duhet të ketë edhe përgjegjësi.