Kurti e Pierce diskutojnë për zgjerimin e bashkëpunimit

Kryeministri në detyrë, Albin Kurti, në një darkë pune me të Dërguarën e Posaçme të Mbretërisë së Bashkuar për Ballkanin Perëndimor, Karen Pierce, diskutuan për marrëdhëniet mes Kosovës dhe Mbretërisë së Bashkuar dhe mundësitë për zgjerim të bashkëpunimit duke përfshirë fusha të ndryshme, nga industria kreative dhe diplomacia deri te mbrojtja e siguria.

“Në përgatitjet për mbajtjen e Samitit të ardhshëm të Procesit të Berlinit i cili do të zhvillohet në tetorin e këtij viti në Londër, kryeministri theksoi domosdoshmërinë e zbatimit të marrëveshjeve të arritura dhe rëndësinë e njohjes reciproke të diplomave dhe lëvizjes së lirë, si jetike për suksesin e Tregut të Përbashkët Rajonal dhe Planin e Rritjes,” bënë të ditur Qeveria e Kosovës përmes një njoftimi për takimin i cili u zhvillua në rezidencën e Ambasadës së Mbretërisë së Bashkuar

Albin Kurti në këtë takim shprehu mirënjohjen për mbështetjen e palëkundur dhe të vazhdueshme të Mbretërisë së Bashkuar ndaj Republikës së Kosovës.

Ndryshe, kjo është hera e dytë që e Dërguara e Posaçme të Mbretërisë së Bashkuar për Ballkanin Perëndimor, Karen Pierce, viziton Kosovën pas vizitës së muajit prill ku ishte pjesë e delegacionit të Sekretarit të Shtetit për Punë të Jashtme të Mbretërisë së Bashkuar, David Lammy.