Kurti: Emërimi i Thaçit thelloi krimin dhe kapjen e shtetit.

Pas emërimit të Njazi Thaçit, si ushtrues detyre i drejtorit të KEK-ut, kryetari i Lëvizjes Vetëvendosje Albin Kurti, tha se që nga mbrëmë, u thellua krimi i organizuar dhe kapja e shtetit.

Lideri i Vetëvendosjes tha se Thaçët dhe PDK-ja, kanë ushtruar pushtet në KEK,  nëpërmjet Njazi Thaçit, i cili për një kohë të gjatë sa ishte drejtor i prokurimit, nënshkroi kontrata që gati e kolapsuan këtë kompani publike.

Kurti më tej tha se Nijazi Thaçi, i cili është një eksponent i krimit të organizuar në Kosovë,  u avancua dhe se kontrolli në shtetin e kapur, po rritet nëpërmjet pozitave të tilla, ku nuk ka njerëz kompetent, e  të ndershëm,  por familjarë të zyrtarëve të majave të institucioneve të sistemit.

Ndërkaq, Avni Zogiani foli për orientimin e fondeve drejt kompanive serbe në kohën sa kushëriri i Hashim Thaçit, Njazi Thaçi ishte udhëheqës i Prokurimit.

Zogiani po ashtu tha se Njazi Thaçi, gjatë karrierës së tij si zyrtar i KEK-ut,  ka shpërblyer me tenderë edhe familjarët e deputetëve të PDK-së. Sipas tij familja e deputetit Shaip Muja,  nëpërmjet kompanisë “Doni” dhe “Ci-Kos”, pronë e Fatmir Mujës, vëllait të Shaipi Mujës, është e kontraktuar për shitjen e skrapit të KEK-ut, ku Zyra e Auditorit të Përgjithshëm ka gjetur një sërë parregullsish.